Sámedigge l maŋemus jagijt bihtámsáme kultuvrav ja kulturárbev ållagasj vuorodam, adjáj doarjjaårnigij baktu. Aktan Bådådjo suohkanijn ja Nordlandsmuseet:jn la Sámedigge virgev tsiekkadussuodjalimsuorgen ruhtadam. Vuorodibme l oassen aktisasjbarggosjiehtadusás Bådådjo suohkana ja Sámedikke gaskan.
Åbddit bihtámsáme tsiekkadusárbev la ruhtaduvvam moatte prosjevta baktu. Bihtámsáme kulturmujto Sáltoduoddarin galggi aj registrieriduvvat.
– Bihtámsáme tsiekkadusárbbe l árvvon dajnas gå dáppe gávnnuji muhtema dajs oabmásamos sáme tsiekkadusájs. Tsiekkadusájt oahpásmahttet nanni bihtámsáme iesjdåbdov, javllá Keskitalo, guhti vássám duorastagá rabáj konferánsav jur bihtámsáme histåvrå ja tsiekkadusdábij birra Sáltoduoddarin.
Sáme kulturárbev vuosádallá
Keskitalo ja sámedikkeráde kultursuodjalibmáj Berit Marie E. Eira ávvudallaba aj gå bessi rudájt juollodit prosjevtajda ma boandás sáme kulturhiståvråv gæhttjijda oahpásmahtti. Ienep stuorra láhtjema li dan diehti rudájt galbbitjit oadtjum.
Årøyholmenin Ivguvuonan galggá merrasáme histåvrå ja dålusj sáme åsko birra gaskostuvvat. Porsaŋgun tjáppa kulturduobdá histåvråjn stáloj birra látjeduvvá. Gahpervákken (Kaperdalen) Sážžán galggi dålusj miehttsesáme årromsaje vuoseduvvat. Juollodum li aj rudá kulturmujtojt Guittanasan (Kvitnes) ja Guolleveaigåhpen (Molvik) Bearalvágen látjátjit.
Moatten guovlon ælla sáme kulturmujto guoradaládum. Registrierimprosjevta li ájnnasa vuosedittjat sáme anov ja årromav. Akta prosjækta mij la dårjav dán jage oadtjum, la registrierima Návetvuomen ja Návuodnabadán. Ællosujtto ja bájkálasj årro galggi dán bargguj oassálasstet.
– Prosjækta midjij edna kulturmujto ja histåvrå buktá, boahtte buolvajda ávvon, javllá sámedikkeráde Eira.
Rudá ráfájduhtedum sáme tsiekkadusájt åbdditjit
Sámedigge l 2012 rájes registrierim ráfájduhtedum sáme tsiekkadusájt ma li 1917 rájes jali oabmásappo. Moaddalågenan tsiekkadusájs li dálla birrusij 900 tsiekkadusá registrieridum. Moattes li buojkkám, sijá æjgon la automáhtalattjat ráfájduhtedum tsiekkadus ja oadtjum li rudájt dáv åbdditjit.
Tsiekkadusæjgáda gudi li dårjav oadtjum årru sáme årromguovlov miehtáj. Sámedigge sierra årnigav háldat ráfájduhtedum sáme tsiekkadusájda ma li priváhta æjgon. Ajtu guhtta millijåvnå kråvnå li dan ulmmáj juolloduvvam.
Ságájdahtátjit jali gatjálvisá, guládalá sámedikkepresidentajn Aili Keskitalojn, telefåvnån +47 971 29 305.