Duodje le kulturguodde æládus mij la riek ájnas sáme gielajda, kultuvrraj ja æládusåvddånahttemij. Danen la dárbbo oaggit duojev kultuvrran ja aj æládussan. Duodje la åvvå ájnas sáme iesjdåbdduj.
– Sámedikken la ulmmen åvddånahttet duojev æládussan, vaj ienebu bessi dassta viessot, javllá sámediggeráde Inger Eline Eriksen Fjellgren.
Fjellgren tjielggi lasedum ruhtajådedibme iesjdagádum duojes stuoráp márnánij le guovdátjin Sámedikke vuorodimen. Dát aj buktá jut profesjonalitiehtta, sisboahto ávkká æládusán viertti laseduvvat.
Ietjá doarjjaårnigijt merustallat
Jahkáj 2017 la Sámedigge tjoahkkáj vuorodam 14 millijåvnå kråvnå duodjáj. E aktak ietjá oassálasste máhte dakkir vuorodibmáj vuosedit. Jagen 2016 lij Sámedikke vuorodibme duodjáj 46% rudájs ma lidjin vuorodum æládusájda. Rudájs vuorodum jahkáj 2016 ienep gå guokta millijåvnå aneduvvin doajmmadårjajda.
Juska duodjára li doajmmadårjav oadtjum, ij la ruhtajådedibme lassánam. Lågo duodjeæládusás vuosedi jut gasskamærrásasj duodjár la tjanádum doajmmadoarjjaj jus doajmma galggá jådeduvvat binná ruhtabátsujn.
– Gå vájkkudimårnik Sámedikken ij dåjma, le miján politihkkárin åvdåsvásstádus hiebadittjat jali rievddadittjat vájkkudimårnigav åmastittjat sávadum vájkkudussaj. Mijá mielas ietjá doajmmadoarjjaårniga lulun buorebut duodjeæládusáv nannit, duola dagu barggostipenda, javllá sámediggeráde Inger Eline Eriksen Fjellgren.
– Motorjåhtulakláhka luluj rievddaduvvat
Moadda duoddára li báddnum ábnnasijda ma miehtsen gávnnuji. Hásstalussan la gå lága baktu ij la siján loahpe mæhttsáj vuodjet ábnnasijt viedtjamin, valla dárbahi sierraloabev motorjåhtulakbuorgulvisás. Dakkir dáhpe ienep bargov duodjárijda buktá, ja ij la sáme ájádusvuoge milta.
– Diedon luluj riektá miehtsen vuodjet æládusaktijvuodan. Motorjåhtulakláhka hæhttu rievddaduvvat vaj duodjára dásseduvvi ietjá æládusbarggij gejn li riektá vuodjet, låhpat Fjellgren.
Guládalá: Sámediggeráde Inger Eline Eriksen Fjellgren, telefåvnnå 414 58 703