Sámedikke kultuvrra- ja valástallamstipænnda nuorajda vatteduvvá Ole Mathis Sara Nedrejordaj, Aslak Ole Eiraj, Ina-Theres Andrea Sparrokij, Sarakka Gaupaj ja Anne Maia Raanes Sørensenij.
Sámedikke kultuvrra- ja valástallamstipænnda galggá arvusmahttet sáme nuorajt oassálastátjit musihkkaj, dájddaj, kultuvrraj ja valástallamijda. Vihtta stipenda vatteduvvi guhtik 25 000 kråvnnåj, ja stipenda li vattedum åtsålvisáj milta.
Rádeájras Henrik Olsen sån la alvaduvvam åhttsij moattebelakvuodas.
-Sidáv javllat goappátjagá åhtsåmusáj vallje ja åhttsij máhtukvuoda bukti buorre vuorddámusájt sáme kultuvrra- ja valástallamiellemij. Oalle gássjel li válljit vihttasav gudi vuojttin, javllá rádeájras Henrik Olsen.
Valástallamstipenda:
Ole Mathis Sara Nedrejord la sabeksasske ja jåvsådam la buorre sajijda goappátjagá ietjama rijkan ja ålggorijkajn. Dijmásj gávdan lij sån rijka nubbe buoremus nuorra sabeksasske.
Aslak Ole Eira tjuojgge guhti vuorot tjuojggamav ållåsit, ja dálla le sån Ráissa joarkkaskåvlå tjuojggamsuorgen. Sujna li buorre båhtusa Artic Winter Gamesijs ja moattet ietjá gilppusijs.
Kultuvrrastipenda:
Ina-Theres Andrea Sparrok la gåvvijiddje. Sån la dokumenterim oarjjelsáme ællobargov buorre ja viesso láhkáj. Gåvåj ja tevstaj oablodahttá sån aj diedojt sámegielas ja kultuvras, ja sån la arvusmahtte sáme nuorajda gejn la miella gåvvådájddaj.
Sarakka Gaup la oavdástalle. Teáhterdájda baktu le sån juo oadtjum guhkes ájge ja moattebelak åtsådallamijt. Gaup vuoset siednadájdas baktu sáme kultuvrragaskostibme guosská. Dájddasuorgen vuorbástuvvat rávkká jálosvuodav ja hiebalgisvuodav, ja sån le degu jiedna nuorrasámijda gudi åhtsi gåsi sij gulluji ja ietjasa ruohtsajt.
Anne Maia Raanes Sørensen la balæhttadánsse. Gávtse jagágin álgij sån karriærav balæhttadánssen. Dánsa baktu máhttá aj sáme kultuvrra tjuovggiduvvat ja åvddån buvteduvvat. Sujna le stuorra hárdesvuohta dánssaj, ja sihtá liehket siegen vuosedittjat ietjá sámenuorajda dánsan aj máhtta liehket sadje sáme kultuvrragaskostimen. Sån la oahppamin balehtav Kanadan. Ådåjakmánon galggá Raanes Sørensen álgget viddnooahppen virggebalæhttaásadusán, Coastal City Ballet.
Sámedikke rádeájras Henrik Olsen javllá stipænndavuojtte gájka li tjiehpes åvddågåve ja ambassadøra sámenuorajda gudi sihti vuorodit valástallamijt ja kultuvrav.
Ienep diedo: Sámedikke rádeájras Henrik Olsen, 907 75 219