Gåvvå: Åse Pulk, Sámediggi
Maŋŋela bulkkediedádusá almodime li nasjåvnålasj oajválattja, sáme sebrudahka, fylkadásse, bájkálasj sebrudahka ja ájnegis ulmutja dárbulasj oassálasste bargguj biledihke sebrudagáv åttjudime. Aktan bájkálasj sebrudagájn sihtá Sámedigge dilev buorre dåjmajda láhtjet.
– Sámedigge la mierredam dåjmalattjat Divtasvuona-ássjev gåtsedit. Danen tjåhkanip DSJ – Doajmma siebrre julevsámijn ja Árran julevsáme guovdátjijn javllamáno 13. biejve. - Sávvap oadtjop árvvalusájt gåktu mij aktan lulujma buoremus láhkáj hábmedit dåjmajt ma lulun ávkken Divtasvuodnaj. Mij lip dálla juo juollodam 150 000 kråvnå doarjjokonsærttaj gånnå mihásvuohta la guovdátjin. Vuordedahtte dassta sjaddi positijva båhtusa ja Sámedikke mielas dát la ájnas doajmma, javllá Sámedikkeráde sebrulasj Mikkel Eskil Mikkelsen
Dárbbo Divtasvuona-ássjev moatten dásen gåtsedit
Árabut dán vahko la Sámedikkeráde diededam, sjaddi gájbbedit guoradallamav almulasj viehkkedievnastusás, mánásuodjalusás ja bulkes gå æjvvali Suohkan- ja ådåsmahttemdepartementav boahtte vahko. Ráde jáhkká subttsasa vaddi sebrudahkaj tjielgga gåvåv, gájkajn la barggo mij vuorddá, ja dat barggo viertti juohkka dásen dagáduvvat.
– Miján hæhttu åbbålasj perspektijvav gå gåtsedip Divtasvuona-ássjev. Gå bajedip ássjev departementa dássáj de sihtap tjalmostahttet, Divtasvuona-ássje gáktuj gåktu la dálla, li moadda gatjálvisá ma ælla vássteduvvam. Da li gatjálvisá dagu dal manen dille máhtij sjaddat gåktu dat le, åvddåla juoga dagáduváj, ja gåktu almulasj instánsa systemáhtalattjat li bæhttám vierredahkoássjijt gåtsedimes. Danen mij bajedip dárbov guoradallamij departemænntaj, javllá Mikkelsen.
Árranav gijttá
Sámedigge la åvddåla doarjjum Árrana bargov gå bajedi tabu-tiemájt. Sámedikkeráde sebrulasj Mikkelsen dættot man ájnas Árrana barggo la maŋemus jagijt læhkám.
– Sáme institusjåvnåjn la åvdåsvásstádus bajedit ja tjuovgadit suorgijt sebrudagán ma vierttiji tjuovgaduvvat. Da galggi bajedit ájggeguovddelis hásstalusájt sáme sebrudagán. Dáv åvdåsvásstádusáv la Árran duodalattjat válldám ja aj dajna vuorbástuvvam. Sámedigge la gijttevasj dan bargo åvdås ja mij jáhkkep dát lij vájkkudibmen dasi, subttsasa seksuálalasj vahágahttemij birra vuojnnusij båhtin. Dán bargo åvdås sihtap Árranav rámmpot, javllá Mikkelsen.