Sámediggeráđđi nammadii juovlamánus diibmá ođđa miellahtuid Sámedikki nuoraidpolitihkalaš lávdegoddái (SáNuL) ja dál lea ge ođđa lávdegoddi vuosttaš fysalaš čoahkkimis Sámedikkis Kárášjogas. Sámediggepresideanta Egil Olli sávai nuoraide bures boahtin Sámediggái ja lihku sin dehálaš bargguin bargamis áššiiguin sámi nuoraid ovddas.
Lávdegoddi lea dehálaš ásahus sámi nuoraid váras, go dat addá nuoraide vejolašvuođa hábmet Sámedikki politihka. SáNuL čoahkkimiid oktavuođas Sámedikkis čoahkkinastti lávdegoddi maiddái Sámedikki várrepresideantta Laila Susanne Vars:ain. Nuorat ožžo gullat ja jearrat Sámedikki barggu birra, muhto ságat várrepresideanttain jorre maiddái hástalusaid ja vejolašvuođaid birra mat leat sámi servodagas. Vahkku mielde galgá lávdegoddi ee. čuovvut go dievasčoahkkin meannuda Sámedikki vuosttaš oahpahusdieđáhusa.
- Lei hui somá oahpásmuvvat nuoraiguin, ja mun vuhtten sis dál juo hirbmat áŋgirvuođa ja beroštumi bargagoahtit sámi áššiiguin Sámedikkis. Lávdegoddi lea hui dehálaš midjiide, danin sávvat ge mii maiddái ahte oažžut buriid oaiviliid Sámedikki 2013-jagi bušehtti, man bargu juo lea álggahuvvon, dadjá Laila Susanne Vars.
Nuoraidlávdegottis lea ollu bargu čuovvovaš beivviid, muhto SáNuL lea čoahkkinastis juo háhppehan ollu digaštallat. Sii leat earet eará ráhkkaneame čoahkkimii mii galgá leat Mánáidáittardeddjiin boahtte disdaga.
- Mis lea leamaš buorre čoahkkin dán rádjai. Mii leat beassat digaštallat olu iešguđet áššiid birra, ja maiddái válljen nubbinjođiheaddji, Áike Niillas Selfors, Deanus eret. Erenoámaš somá lea dieđusge oaidnit eará miellahtuid lávdegottis, go dát han lea vuosttaš háve go mii beassat deaivvadit albma ládje dan rájes go mii válljejuvvuimet lávdegoddái, dadjá lávdegotti jođiheaddji Sagka Marie Fjellheim Danielsen.
Loga eanet Sámedikki nuoraidpolitihkalaš lávdegotti birra dás!
Čuovo maiddái lávdegotti Facebook siiddu bokte, ja geahča sin blogga.
Oktavuohta:
Politihkalaš ráđđeaddi Johan Vasara, tlf. 918 89 200
