Sámedikkepresidænnta Aili Keskitalo sávvá vuojttijda vuorbev. Sån javllá gájka vuojtte li buorre åvddågåvvån ietjas valástallam- ja kultuvrrasuorgen.
– Gájka stipænndavuojtte vuosedi sij duodalattjat vuorodi ietjasa suorgev, ja vuosedi aj buorre båhtusijda bájkálattjat, guovlon ja nasjåvnålattjat. Gájka li árvvusasj vuojtte stipendajs ja li buorre åvddågåvvån iehtjádijda, javllá sámedikkepresidænnta Aili Keskitalo.
Stipænnda galggá nuorajt måvtåstuhttet
Sámedikke kultuvrra- ja valástallamstipænnda galggá måvtåstuhttet sáme nuorajt berustahttját dájdda, kultuvrra- ja valástallamsuorgijn. Niellja stipenda, 25 000 kråvnå juohkkahattjaj, juogeduvvi. Stipænnda galggá ájnegis ulmutjijda goappásj sjierves juogeduvvat. Sij gudi stipendav oadtju galggi liehket 16 ja 25 jage gaskan dan jage gå stipænnda juogeduvvá.
Sisi båhtin 20 åhtsåmusá, valla akta åhtsåmus bådij ájggemiere maŋŋela. 12 åhtsin valástallamstipendav ja gietjas gis kultuvrrastipendav.
Vuojtte valástallamstipendas
Sámedikkepresidænnta Aili Keskitalo javllá, vuohttje Benedicte Guttorm ja taekwondo-valástalle Sajane Karina Olsen libá gætjo gávdav buoragit vuorbástuvvam , ja ietjaska valástallamsuorgen libá goappátja buoremusáj gaskan, guovlo dásen ja nasjåvnålasj dásen. Sån libá buorre åvddågåvvån sáme nuorajda gudi sihti valástallamav vuorodit, javllá Keskitalo
Benedicte Guttormin lij buorre åvddånibme ietjas valástallamsuorgen, ja la jåvsådam ihkeva buorre båhtusijda guovlo ja aj nasjåvnålasj dásen. Dán jagásj Landsskytterstevnen Stjørdalan vuojtij dajvvavuohtjemav vuorrasap nuorajda, ja sjattaj nubben sjalljovuohtjemin.
Sajane Karina Olsen la gilpustallam guovlo, nasjåvnålasj ja rijkajgasskasasj dásijn suorgijn mønster ja sparring. Sån la jåvsådam buorre båhtusijda ja oadtjum ienep NVG,- VM- ja World Cupmedáljajt. Sån sihtá åvddånit taekwondo-suorgen, ja ållåsit dasi rahtjá. Sån dåjmalattjat vahkojn hárjjidallá, ja duodden dasi nuorap valástallijt bagádallá. Jur dálla la sujna tjáhppis avve valástallamsuorgenis.
Vuojtte kultuvrrastipendas
– Anna Kaisa Partapuoli ja Johan Daniel Turi libá goappátja dájddára vaddásij. Nubbe la mihtos sjaddam slampoesijjan, nubbe l álgon allasis sajev dahkamin ietjas suorgen kultuvrraiellemin. Goappátja libá stuorre rahtjamusáv vuosedam, ja ålles vájmos vuorodibá kultuvrrahámijt. Såj libá buorre åvddågåvvån sáme nuorajda gudi sihti dájdav ja kultuvrav vuorodit, javllá sámedikkepresidænnta Aili Keskitalo.
Anna Kaisa Partapuoli l moattebelak kultuvrradåjmadiddje, ja duodden åhpadussaj barggá dájdájn ja duojij. Partapuoli la dåbdos slampoehtta sáme sebrudagán, ja lij 2018 válljidum dan jagásj nuorra dájddárin Riddu Riđđu festiválan. Sáme slampoesijja la ådådahko sáme girjálasjvuodan ja kultuvrraåvddånbuktemin. Sån aj árbbedábálasj duojev ájmon anet, ja guhkesájggásattjat sihtá viessot dájdas ja kultuvras.
Johan Daniel Turi låhkå doajmme klassisk musihkav NTNU:n Roandemin. Sujna la stuorra berustibme dagátjit sáme musihkav ja la åvddåla barggam hárjjánam tjuojadiddjij siegen. Turin li plána åvddålijguovlluj ållidum åhpadusá maŋŋela, ja dat la åbbålattjat kultuvrav vuorodit.
Ienep diedo: Sámedikkepresidænnta Aili Keskitalo, 971 29 305