Vuojtádalli ressursagilppusin

Sámedigge sáme dávvervuorkájt háldadáhttjáj 2002 rájes. Sæmmi jage rájes lij aj Sámedikke duogen stáhta doarjjagav dájda dávvervuorkájda juogadit. Dát dáhpáduváj gå nasjonála dávvervuorkkáådåstus tjadáduváj, ja aj prinsihpalasj vuojno milta jut álggoálmmuga ietja galggi kulturárbesa háldadit.

Cand. oecon. Stein Storsul le guoradallam sáme dávvervuorkáj dilev ja buohtastahttám lågoj dávvervuorkájs ma ælla Sámedikke háldon.

Dánna tjuovvu analyjsa oajvvetjuokka.

1. Dávvervuorká li mihá gå gávnnuji sáme vuodomáddagin ásadusájs ma sáme kulturárbe åvdås vásstedi, ja fágalasj máhtudagájs ma dáj dávvervuorkájn gávnnuji ja materiála ja iehpemateriála kulturárbe åvdås majt háldadi.
2. Dávvervuorkáj vejulasjvuoda li vil tjielggasappo njunnjutjin liehket sáme kulturtsieggimin, ienep dutkamin ja buorep gaskostimen.
3. Dávvervuorkájn li smáv ja várnnahis barggebirrasa ja lokalitehta ælla heva.
4. Dávvervuorká miejnniji Sámedigge hæhttu tjielggasappot sihtat tjadádit ja aktidit sámij ietjasa kulturárbe háldadime åvdåsvásstádusáv ja riektáv.
5. Dávvervuorkájn li dárbo ietjas fágalasj vuodov nannit ietjá dávvervuorkáj gávnij repatrieriga(máhttsama) baktu, ådå gávnij ja immatriála kulturárbe tjoahkkima baktu, ja ietjasa fágalasj barggovegaj nannima baktu sihke DJÅ(FOU) ja gaskostimen.
6. Dávvervuorká dárbahi gávnijt buorebut suoddjit buorep tsiekkadusájn magasijnajda ja vuosádusájda. Dåssju avtan dávvervuorkán le dálkádakstivrridum magasijnna.
7. Dávvervuorká sihti nannit sámegielaj dåjmalasj anov dávvervuorkkábargon.
8. Dávvervuorkájda le ájnas jut siján li ressursa dåjmalasj oassálasstemij fágalasj værmástagájda vuona ja nuorttarijkaj guojmmedávvervuorkáj, universitehtaj, allaskåvlåj ja ietjá ásadusáj siegen.
9. Sáme dávvervuorkáj mielas ælla bessam oassálasstet ruhtadilebuorránimen mij le læhkám dávvervuorkásuorgán ietján dávvervuorkkáådåstusá baktu.
10. Dávvervuorká guorrasi jut dárbbo le dávvervuorká sihke buorebut aktiduvvi politihkalasj agendan sáme kulturárbe diehti, ja váj ráddjidum ressursajt buorebut adni.
    1. ABM-utvikling (uddni Norsk kulturråd) fágalasj tjuovvolibme hedjunij maŋŋel gå Sámedigge háldadusáv oattjoj – gåjt dal dáttja museaj gáktuj.

Analyjssa vuoset moadda fylkkasuohkana ja suohkana li ietjasa juollodimijt binnedam sáme dávvervuorkájda maŋŋel gå Sámedigge háldadattjáj.

-Mihá lev sáme dávvervuorkájs ma nav buoragit ráddjidum ressursaj barggi. Sáme njunnjutjin li bájkálattjat ja guovlolattjat, ja li ájnas máhtudakásadusá ålles sebrudahkaj. Dávvervuorká li ájnnasa mijá akitsasj kulturárbe háldadusán ja danen luojov gå dávvervuorká dáttja dávvervuorkáj gáktuj báhtsi, javllá rádeájras Vibeke Larsen.

-Gå Sámedikke duogen sjattaj sáme dávvervuorkájt háldadit de da ettjin nanniduvá sæmmi ålov dagu ietjá dávvervuorká Vuonan. Árvvedahtte ij lim dát ulmmen gå åvdåsvásstádus Sámediggáj vatteduváj, ja jáhkáv dát le rijkajgasskasasj vælggogisvuodaj vuosstáj ma Vuonan li álggoálmmuga hárráj, javllá Larsen.

Rádeájras Vibeke Larsen javllá Sámedigge galggá joarkket sáme dávvervuorkáj ájnas bargov doarjjat, sæmmi båttå dagu sámediggeráde sihtá åvdedit dávvervuorká dárbojt váj máhtti sáme kulturárbev dåhkkidahtte láhkáj várajda válldet.

Raporta