Stuorgiette bajássjaddamguovdásj

Mánnájgárde visjåvnnå: Suohttasij ja ávojn viessop jur dálla, vilá rahtjamin alme vuosstij.

 

Stuorgiette mánnájgárdde sjattaj oasse Stuorgiette bajássjaddamguovdátja bårggemáno 1. biejve 2004, ja le sæmmi sajen gå skåvllå.  

 

Åssudagán le sadje 12 mánájda jagij 1-5. Mánnájgárden li gålmmå bargge; akta dajs pedagogalasj jådediddje.  

 

Mánnájgárde oajvveulmme le vájkkudit buoremus láhkáj mánájda buorre mánnávuodav vaddet. Pedagogalasj vuodon le mánnájgárden, nav gåk aj skåvlån, gålmmå oajvveoase; hukso, bajásgiessem ja máhtudahka. Dát tjadáduvvá gå mánáj njunjákvuodav, diehtemvájnov ja oahppamhálov arvvadahttá. Duodden le ájnas mánájda åtsådallamijt ja hásstalusájt iejvvit, ma li álldarij, máhtudahkaj ja berustibmáj hiebadum. Bargge li agev mánáj birrusin, jasska oatsodiddjen gåsstå máná máhtti væráldav guoradallat. Mánnájgárdde le vuostasj oasse mánáj iellemájge oahppamis.

 

Biejve- ja biejve dåjmaj tjadá tjadáduvvi stuoves oahppamdåjma. Máná bessi oahppat ja åtsådallat gåktu le oassen aktijvuodas liehket, ja ielvvet aktijvuoda buorre ja nievres bielijt. Árkkabiejve dåjma li danen ájnnasa, gå hábbmiji mánáj ietjasa dádjadusáv aktijvuoda birra, ja gåktu buoremus láhkáj iehtjádij vuosstij liehket.

 

Duodden bajássjaddamguovdátja ståhkamsalljuj ja goahtebirrusij, le mánájgárden ietjas ståhkamsaljusj sáttojkássajn, ståhkusij ja goadátjijn.  

 

Mánnájgárden le akta tuvrrabiejvve vahkkuj. Mánnájgárdes ij le vuojga guhkás mæhttsáj jalik fiervváj. Stuor oasse mánnájgárde pedagogalasj oases le hiebadum luondo jábijda.

 

Mánnájgárdde ávkástalli Bajássjaddamguovdátja sierra lanjájs, duola degu lásjmudallamladnja, girjjevuorkká, duodjeladnja ja gievkan.
 

Juohkka gasskavahko látjeduvvá bievdde mánnájgárden hávsskes bårråmbåttåtjij mánájda ja ållessjattugijda.   

 

Mánnájgárden ávvudaláduvvá mánáj riegádimbiejve ja jage base. Ietjá árbbedábálasj ávvudallama li: lucia, javllagárvedime, nisseávvudallam, biejvveávvudallam, karneval, bæssásjgárvedime, álmmukbiejvve ja jahkehiejttem.