Låvdagoahte le tjielggasit juogedum.

Låvdagoade åvdemus oasse, sadje ållu sisŋemusán, árrana ja loavddaga gaskan le ájlis sadje boassjo, gånnå biebmo ja ájlis gávne vuorkuduvvin. Boassjo le ájnas. Árranin le stuorra giergge mij boassjo-gierggen gåhtjoduvvá. Muhtema javlli dát giergge galggá mijáv mujttádahttet man rádjáj máhttep mannat åvddål ájlis guovlov doadjep. Dålusj sáme åskon lij nissunjubmel Juoksaáhkká guhti boassjov suoddjij. Juoksaáhkká lij bivddojubmel guhti bivddovuorbev bivdárijda buvtij. Sån aj bivdárijt ja bivdov tjuovov ruopptot boassjuj gånnå gáhttij bivdov. Máttaráhká gålmmå niejda: Sáráhkká, Juoksaáhkká ja Uksáhkká, ráddijin iellema badjel ja årromsaje birra. Dát vuoset gåktu ”ednamlasj jubmela” lidjin låvdagoahtáj ja bæjválasj iellemij tjanáduvvam.

 

Ájlis ladnja

Låvdagoade juohkem bådij dassta gå jubmela lidjin ájnnasa sámij árkkabiejvveiellemin, bårrin ja idjadin ájlis lanján. Apostelij dagojn subtsastuvvá gåktu vuostasj ristagisá tjåhkanin. Ittjij gávnnu girkko. Æjvvalin tiempelsajen ja priváhta sijdajn. Åvddål jahketjuohtemålssoma lidjin laestadiánálasj tjåhkanime gámátjijn.

 

Majt usjudalá girkko birra uddni? Dåbdåk ietjat sijdan jali guossen jubmela vieson?

Låvdagoahte le årromsadje, bårråmsadje ja hávsskudallamsadje. Låvdagoahte suojev vaddá ja mierkki almatjij vájaldibme ja ulmme. 

 

låhkåp jåhtte almatjij birra gudi teltajn årrun. Duola dagu Abraham åroj teltan aktan Isakijn ja Jakobijn (Hebr. 11,9) ja Moses teltav biejaj lejra ålgusjbælláj (2. Mos 33,7). 

 

Guoddeådnårisá låvdagoaden soajttá mierkkit Áhtjev, Bárnev ja Ájlis Vuojŋŋanisáv. Ja då ietjá ådnårisá li ulmutja gudi ietjasa iellemijt daj nanna biggiji.