Ednam le vattos sjivnnjádusás
Luonndo le almatjijda ávvon ja adnon vatteduvvam dán væráldin. Almasj le ednamis dagádum ja miján le sierralágásj dahkamus ednama gáktuj. Galggap luondov sujttit ja dav háldadit váj juohkkahasj máhttá dassta viessot.
Ulmusj muhtem bájkkáj gullu, ij vuosstálakkoj. Åvddåla lidjin sáme organiseridum sijdaj milta. Mierredum sijdajn lidjin riektá guohtomij ja bivdduj sijá guovlon. Jus luondov æhttsá de tjuovvu aj åvdåsvásstádus dav sujttit. Uddni sijddanamma ienemusát boatsojsujton aneduvvá.
Åvdebut lidjin almatja nannusit luonnduj tjanádum, valla gåktu le uddni? Gåktu udnásj almatja luondov adni? Gåktu vieledip ja vuosedip vuollegasjvuodav ja iehttsep luondov? Ja makkir vuogijn?
Sisano birra
Vuojnnemahtes Jubmelij jáhkket, le viehka gássjel. Rámát javllá Jubmel væráldav sjivnnjedij.
Jubmel almatjav ednamis sjivnnjedij. Jubmel le almatjij sierralágásj dahkamusáv vaddám ietjá sjivnnjádusáj gáktuj. Jubmel le miejnnim almatja galggi liehket háldadiddje, guojmmebargge ja dievnára. Ij le miján riektá allasimme válldet gájkka ja dåssjidit iellemav ja luondov. Jábmemin galggá almasj vas ednamin sjaddat, ja vas ednamis bajástjuodtjelit maŋemus biejve. Ednam le oassen sjivnnjádusás. Ednam vaddá sjattojt, biebmov, tjátjev ja gájkka majt dárbahip. Ájgij tjadá li almatja bierggim dassta majt luonndo vaddá. Sáme árbbedábe milta le ájnas luondo jiednaj gulldalit. Majt dat mierkki? Galggap sjávot luondon manádit ja ep galga válldet ienebuv gå majt luonndo gierddá. Galggap buorissjivnnjedit dav mij viessu. Galggap viessot gijttolisvuodan Sjivnnjediddjáj ednama vaddásij åvdås.
Velg emne:
