Lapp-kapella Ankareden

Ankarede kapella. Dán girkko birás le tjielggasit sáme birrasij bájnnidum. Girkkosaje birra li viehka moadda gåetieh. Návti le guhkás læhkám. Guovlon”blåsjö-bo”-oasse smáv stugorij, ja ”lapp”-oasse gånnå li gåetieh ja buvrieh. Dá guokta kultuvra viessoba nubbe nuppe guorralakkoj. Moadda sáme li dán girkkogárden hávddáduvvam.

Moadda hávsskes mujto li báhtsám árbbedábálasj sáme girkkoájllegijs. Dákkir vásádusá tjadni buolvajt aktij ja aktijvuodav nanni.

Mihttsamára jubmeldievnastusáj, sáme girkkoguossodiddje aneduvvi saemien vaarjoeh baddjen koran. Jubmeldievnastusán sámegiella aneduvvá gå rámáttevsta, sálma ja oasse liturgijas sámegiellaj tjadáduvvá. Dát målssu jages jahkáj.

Girkkon aktijvuohta nanniduvvá. Bessap ristagis aktijvuohtaj Jubmelijn ja nubbe nuppijn jáhko baktu Jesus Kristusij. Jubmel ij sidá galggap aktu liehket ristagisá. Jubmeldievnastusán dát aktijvuohta vuojnnusij boahtá gå lip aktan jáhkkodåbdåstusá, iehkedismállása, råhkålvisá ja sálmaj birra. Áhttje Mijá le dat råhkålvis mav Jesus iesj le midjij oahppam.

Jubmeldievnastus sisadná moadda ássje: rámáttevsta, sárnne, råhkålvisá, sálma ja iehkedismáles. Juohkka sådnåbiejve muhtem mierredum  tiebmá, låggŋiduvvá, mij le vuodon rámáttevstaj, sárne ja sálmaj válljimin. Jubmeldievnastusán le sierra liturgija gásstaj, konfirmasjåvnnåj, hávddádibmáj ja hedjaj. Juohkkahattjan le mierredum dahkamus jali rolla, ja gájkka mij dáhpáduvvá le årniga milta.

Gåktu le jubmeldievnastus sáme jubmeldievnastus? Sámegiela ano diehti? Girkkohervaj baktu? Sárne, råhkålvisáj jali liturgija sisadno? Musihkka? Sij gudi jubmeldievnastusán oassálassti?

Sárnne ja sálma sámegiellaj li viehkken gå le sáme jubmeldievnastus. Girkkotsiekkadus, dájdda ja symbåvlå girkkon li viehkken girkkotsiekkadusáv sáme birástahkan ásadit. Liturgalasj biktasa majt báhppa, kantor ja katekehta adni, li viehkken sámevuodav vuojnnusij buktet bájnoj, symbåvlåj ja minsstarij. Bájkálasj girkko ja tjoaggulvisráde sihtá jubmeldievnastusáv hiebadit váj juohkkahasj bájkálasj sebrudagán váset girkkov ietjas girkkon.