Aajja subtsas

Aajja subtsas dallutjis gå suv máttaráddjá hejajda galgaj. Sujna lij guhka váttsos ja ittjij avtan biejven jåvsåda. Hæhttuj ijástallat muhtem båvnij guoran jávrregátten. Gå idedis vas smaredij de ájtsaj oadám lij moadda ráboj gassko. Valla ittjij ballá. Gullam lij man gássjel lij suvddet jábbmegijt váres vuolus gitta merragáddáj gånnå girkko lij gå ællim vedja. Danen lagámusá luonnduj hávddádin. Dalloj ettjin gávnnu njuolgadusá dan hárráj. Sij gudi jábmin beras lulujin vuojŋadallat lahkusin dåppe gånnå ulmutja båhtin mieddel, navti ettjin dárbaha liehket aktugattja madi bajástjuodtjelimev vuordatjin. Vuordedijn bessin gullat gå ulmutja jåhtålin mieddel æloj. Bessin hávsskudallat jienaj daj smáv miesijs ma ruovggin áldostis gávnnat. Nav guhkev gå sij gudi viessu e dåssjev háreda sijáv gudi li jábmám, de bessin ráfen idjadit.

Dát subtsas le jábmema birra. Rámát javllá "láhppup" gå jábmep (1 kor 15, 18). Akti boahtteájgen galggá Jesus ruopptot boahtet værálda gånågissan. Galggá ietjas rijkav vuododit gånnå ij desti makkirak bahá gávnnu.

Makkir aktijvuohta le dujna jábmemij ja hávddádallamij?

Vuojnnemahtes Jubmelij jáhkket, le viehka gássjel. Rámát javllá Jubmel væráldav sjivnnjedij.
Jubmel almatjav ednamis sjivnnjedij. Jubmel le almatjij sierralágásj dahkamusáv vaddám ietjá sjivnnjádusáj gáktuj. Jubmel le miejnnim almatja galggi liehket háldadiddje, guojmmebargge ja dievnára. Ij le miján riektá allasimme válldet gájkka ja dåssjidit iellemav ja luondov. Jábmemin galggá almasj vas ednamin sjaddat, ja vas ednamis bajástjuodtjelit maŋemus biejve. Ednam le oassen sjivnnjádusás. Ednam vaddá sjattojt, biebmov, tjátjev ja gájkka majt dárbahip. Ájgij tjadá li almatja bierggim dassta majt luonndo vaddá. Sáme árbbedábe milta le ájnas luondo jiednaj gulldalit. Majt dat mierkki? Galggap sjávot luondon manádit ja ep galga válldet ienebuv gå majt luonndo gierddá. Galggap buorissjivnnjedit dav mij viessu. Galggap viessot gijttolisvuodan Sjivnnjediddjáj ednama vaddásij åvdås.