Ristagissan liehket

Vuostatja gudi Jesusij jáhkkin ristagissan nabdeduvvin, Kristus namá diehti.

Jubmelij jáhkket le sunji luohtedit. Dat vájmos boahtá. Ij máhte bágoj baktu duodastuvvat, ij ga diedalasj teorijaj baktu duodastuvvat jali tjielggiduvvat. Diedon ij dát mierkki ij besa gæhttjalit jergajnis dádjadit, valla jáhkket jali iehttset, dat ij máhte tjielggiduvvat. Dav hæhttu iesj vásedit. Moaddása dåbddi ietjasa jasska gå Jubmelij jáhkki.

Soajttá liehket gássjel jáhkket Jesus le ednama nanna viessum. Mij gudi uddni viessop ep besa Jesusav vuojnnet, valla dåbddåp histåvråv suv birra, danen gå suv birra le Rámádin tjáledum.

Manen dån Jesusij jáhká? Manen le muhttijn gássjel Jesusij jáhkket?

Rámádin buohtastahteduvvá biejvve Jesusijn, tjuodtju Jesusa muohto lij biejve lágásj, ålles fámos bájttemin (Big. 1, 16). Sij gudi Jesus Kristusij jáhkki gåhttju ietjasa ristagissan. Majt sihtá javllat Jesus Kristusij jáhkket? Assisia Fránssa sidáj guojmestis iehttset suv åvdås dievnnudijn. Boandás iellemav guodij. Gåhtjoj låttijt, juhtusijt, giedjegijt ja sjattojt ietjasa oabbán ja vielljan. Lågå Assisia Fránsa andaktav gånnå juhtusij ságas.