Lågev budá
Jubmel Mosesij vattij 10 budá Sinai-váren. Budá lidjin guovte gierggetáblojda tjáledum. Budá lidjin Jubmela tjuoldedum álmmuga, israelihtaj, iellemnjuolgadusá. Jubmel álmmugij lágav vaddá danen gå sihtá sijáj viehkedit. Vuogas birástagá iellemin le gieresvuohta Jubmelis. Ulmutja årnigav ja ráfev dárbahi. Vuostasj gålmå budáj sisadno le almatjij aktijvuohta Jubmelijn. Gietjav ma tjuovvu sisadni almatjij aktijvuodav guhtik guojmestiska. Budá li guovtegierde gieresvuodabudáj tjoahkkidum: Galga gájkinåvdemusát Jubmelav iehttset, ja ietjat guojmmealmatjijt dagu allasit.
Le gus dån avtak dájs budájs doadjám maŋemus ájge? Makkir budá le gássjelamos tjuovvot?
Sisano birra
Dållå lieggi, tjuovgav ja lahkavuodav buktá. Dållå snjibttju, viessu. Muhttijn le hásstalus oadtjot dålåv buolátjit juohkka lágásj dálken ja duobddágin. Sámegielan li sierra bágo dållåj mij le ålggon, stuorrudagá milta, makkir dållåmuorra le, duobddága gånnå dållip ja moadda ietjá faktora vaddi iesjguhtik namáv dållåj.
Dålå birra árrangiergijt biedjap váj ep miehtsev birra bieste buollát. Jubmel le ietjas álmmugij vaddám giergijt 10 budáj. Mij dá lågev budájn tjuodtju? Jubmel Mosesij budájt vattij váj Israela álmmuk galgaj viehkev oadtjot aktan viessot vuogas láhkáj.
Dållå lieggi ja le luondulasj tjåhkanimsadje midjij.
