Jubmeldievnastus låvdagoaden?
Máhttep gus jubmeldievnastusáv låvdagoaden ásadit? Sadje gånnå dåbddå aktijvuodav dålå birra, ladnja gånnå sáme giella, kultuvrra ja árvo luondulattjat åvddån båhti.
-Låvdagoahte le sáme tællta mij le praktihkalasj ja vuogas. Makta ulmutja dåbddi gullevasjvuodav muhtem bájkkáj boahtá konkrehta dåbdojs ja åtsådallamijs bájkes. Åtsådallama soajtti liehket negatijva ja positijva. Juohkkahattjan li bájke majt lijkkuji ja majt e lijkku, ja dát målssu persåvnås nubbáj.
-Låvdagoade jårbbis hábme gåvvit aktan lip. Árran le aj jårbbis. Dát soajttá aj mierkkit juohkkahattja li sæmmi dásen ja li avtaárvvusattja. Na suovva mij badján dålås låvdagoade gassko? Dat soajttá mierkkit råhkålvisájt ma Jubmelij bajás manni. Na jus tjielggip Ájlis Vuojŋŋan le suovva?
-Bessap åtsådallat aktijvuodav Jubmelijn låvdagoaden, girkkon ja luondon. Juohkka sajen ajtu. Jubmel ij ietjas dibde mierreduvvat muhtem bájkijda.
-Bessap åtsådallat aktijvuodav Jubmelijn låvdagoaden, girkkon ja luondon. Juohkka sajen ajtu. Jubmel ij ietjas dibde mierreduvvat muhtem bájkijda.
Sisano birra
Girkkon aktijvuohta nanniduvvá. Bessap ristagis aktijvuohtaj Jubmelijn ja nubbe nuppijn jáhko baktu Jesus Kristusij. Jubmel ij sidá galggap aktu liehket ristagisá. Jubmeldievnastusán dát aktijvuohta vuojnnusij boahtá gå lip aktan jáhkkodåbdåstusá, iehkedismállása, råhkålvisá ja sálmaj birra. Áhttje Mijá le dat råhkålvis mav Jesus iesj le midjij oahppam.
Jubmeldievnastus sisadná moadda ássje: rámáttevsta, sárnne, råhkålvisá, sálma ja iehkedismáles. Juohkka sådnåbiejve muhtem mierredum tiebmá, låggŋiduvvá, mij le vuodon rámáttevstaj, sárne ja sálmaj válljimin. Jubmeldievnastusán le sierra liturgija gásstaj, konfirmasjåvnnåj, hávddádibmáj ja hedjaj. Juohkkahattjan le mierredum dahkamus jali rolla, ja gájkka mij dáhpáduvvá le årniga milta.
Gåktu le jubmeldievnastus sáme jubmeldievnastus? Sámegiela ano diehti? Girkkohervaj baktu? Sárne, råhkålvisáj jali liturgija sisadno? Musihkka? Sij gudi jubmeldievnastusán oassálassti?
Sárnne ja sálma sámegiellaj li viehkken gå le sáme jubmeldievnastus. Girkkotsiekkadus, dájdda ja symbåvlå girkkon li viehkken girkkotsiekkadusáv sáme birástahkan ásadit. Liturgalasj biktasa majt báhppa, kantor ja katekehta adni, li viehkken sámevuodav vuojnnusij buktet bájnoj, symbåvlåj ja minsstarij. Bájkálasj girkko ja tjoaggulvisráde sihtá jubmeldievnastusáv hiebadit váj juohkkahasj bájkálasj sebrudagán váset girkkov ietjas girkkon.
