Ristagis jáhkko

Gieresvuohta l vuodo ja ulmme ristagisjáhkkuj. Gájkka oalle gieresvuohta boahtá Jubmelis. Gieresvuohta vaddá viessomav.

Foto: Jim Elfström

Máhttep dåbddåt gieresvuodav gasskavuodajn ietjá ulmutjij ja Jubmelijn. Jubmel sihtá mijá viessomav ja sihtá vuododit gasskavuodav juohkka ulmutjij. Jesusa baktu oadtjop ienebuv diehtet majt Jubmel sihtá ja gut Jubmel la.  

Jubmel ulmutjin
Jesusin la sierralágásj lahka gasskavuohta Jubmelij, sån la Jubmel iesj ulmutjin. Giehto Jesusa birra gávnnuji nieljen evangeliumin Rámádin. Rámát la girjje måttijn åsijn mij giehttu ulmutjij gávnadimij dåbdijdusájt Jubmelijn. Jesus väráldij boahtá danen gå Jubmel mijáv ähttsá ja sihtá midjij ihkevenájgev rahpat, goappátjagá åvddåla ja maŋŋel jábmema. Jubmel sihtá mij galggap oadtjot ienep diedojt Jubmela rijka birra ja gieresvuoda birra.
 
Girkko guovdásj ja viessomgálldo
Girkko guovdásj ja viessomgálldo l Jesus Kristus ja evangelium suv birra. Evangelium ulmutjav doalvvu aktisasjvuohtaj Jubmelijn, gut la suv sjaddam ja ulmme. Jubmelin la vijsesvuodas, ármos ja gieresvuodas rájedis tjiegŋalisvuohta.

Girkko jáhkko l vuodo åskeldibme Jubmelij ja l vuododum Jubmela ájmodis dagojda, ma li dåbddusa Rámádin ja duosstu ulmutjijt sijá viessomin.
 
Råhkålvis la ájnas
Jáhkket la dårvustallat ja oajbbot. Råhkålvis ja dábálamos vuohke jáhkkuj. Råhkålittjat ij dárbaha jáhkket. Vájmo duodalasjvuohta ja åhtsålibme l ájnas råhkålvissaj. Ájgev mierredit råhkålvissaj ja dáv ájgev årrot aktu allasis ja suv råhkålvisájn la álggovijor gasskavuohtaj Jubmelijn. Ij la ájnas man buoragit mijá råhkålvis la hábmádum. Vájmo ságastallam Jubmelijn la ájnas.
 
Ristagis dåbdåstibme
Ristagis girkko dåbdås avtav Jubmelav- Áhttje, Bárnne ja ájlis Vuojŋŋanis – mij sjivnnjet, lånes ja iellemav vaddá. Svieriga girkko l väráltvijdes girkkos oasse ja juohká ristagis dåbdåstimev  ja hieveduslávludisáv goalmaktes Jubmelij. Jáhkko åvddåjbuvteduvvá dåbdåstimen bágon ja dagon ja l árbbe apostolak ájges. Gålmån oabmásamos jáhkkodåbdåstimen li sierrasadje gåvådussaj jáhko ja girkko aktelasjvuohtajt ájgij tjadá. Lågå guovtev dajs rievtesbielen.
 
Evangelak-luhterak girkko
Svieriga girkko gullu evangelak-luhterak árbbedáhpaj augsburgak dåbdåstimijn 1530 jage rajes mij aktidij dåbdåstimtjállagav. Dåbdåstimtjállaga reformasjåvnnåájges li bagádiddje vihtanus gåktu jáhkko tjielggiduváj vásstádussan ájge gatjálvisájda.

Girkko jáhkko ja åhpadus hábmáduvvá teologalasj refleksjåvnå baktu mij la jáhkko ja dåbdåstibme.  Viddno la aktugasj ristagisájda ja girkkuj juohkka ájge ådåsis dåbdojn ájádallat jáhko tjiegŋalisáv ja tjielggit dan sisanádusáv. Ij jáhkkodåbdåstibme ij ge åhpadus la ulmme jáhkkuj. Da vuosedi mij la girkko vissesvuohta ja tjielggiji jáhkov. Aktan ájdan ságastallmijn ietjá árbbedábij, sárnnedimen ja jubmeldievnon Svieriga girkko åvddålijguovlluj suv jáhkov sárnnet.

Apostolak jáhkkodåbdåstibme

Skapad: 2011-06-22 10:25:00

Mij jáhkkep Jubmel Áhttjáj, gájkväksásij,
alme ja ednama sjivnnjediddjáj.
Jáhkkep aj Jesus Kristusij,
suv ájnnariegádim Bárnnáj, mijá Härráj,
guhti ájlis Vuojŋŋaisás sahkanij,
niejdda Marias riegádij,
Pontius Pilatusa vuolen vájveduváj,
ruossinávlliduváj, jámij ja hávddáduváj,
jábbmegij rijkkaj luojttádij,
goalmát biejve jábbmegij lussta tjuodtjelij,
almmáj vuolgij, gájkviekses Jubmel Áhtje,
oalgesbielen tjåhkkåhime,
dåppelt vas boahtemin viessojt ja jábbmegijt duobbmitjit.
Jáhkep aj ájlis vuojŋŋanissaj,
ájlis aktisasj girkkuj,
ájllisij sebrudahkaj, suttoj ándagisluojttemij,
jábbmegij tjuodtjelibmáj ja iehkeva iellemij.
Amen.

Nikenak jáhkkodåbdåstibme

Skapad: 2011-06-22 10:30:00

Mån jáhkáv ájnna Jubmelij, gájkviekses Áhttjáj,
guhti almev ja ednamav sjivnnjedij, ja gájkka majt vuojnnep ja gájkka mij vuojnemahtes le;
Jáhkáv ájnna Härráj, Jesus Kristusij, Jubmela ájnnariegádim Bárnnáj, Áhtjes riegáduvvam gájkka ájgij åvddål, Jubmel Jubmelis, tjuovgga tjuovgas, duohta Jubmel duohta Jubmelis,  riegáduvvam, ij sjivnnjeduvvam, sämmi luondos gå Áhttje, Suv baktu le gájkka sjivnnjeduvvam; mijáj almatjij ja mijá sálukvuoda diehti almes luojttádij ja almatja hámen bådij ájlis Vuojŋŋanisá baktu niejdda Marias ja almatjin sjattaj; mijá åvdås ruossinávlliduváj;
Pontius Pilatusa vuolen, vájveduváj ja hávddáduváj; goalmát biejve tjuodtjelij, tjáluga milta, ja almmáj vuolgij tjåhkkåhime Áhtje oalges bielen; dåppelt vas herlukvuodan boahtemin viessojt ja jábbmegijt duobbmitjit, gen rijkan ij nåhkåm le; jáhkáv aj ájlis Vuojŋŋanissaj, Härráj ja häggavaddáj, guhti Áhtjes ja Bárnes boahtá, ja guhti aktan Áhtjijn ja Bárnijn råhkåluvvá ja guddneduvvá ja guhti profehtaj baktu hålaj; jáhkáv ájnna, ájlis, aktisasj ja apostolak girkkuj. Dåbdåstav ájnna gástadusáv, suttoj ándagisluojttemij, ja vuordáv jábbmegij tjuodtjelimev ja boahtte värálda iellemav. Amen

 

//