Gijtto muv åvdås! |

Vuoj man suohtas låhkåt dajt majt

Á-K tjállá, ållo ájádusá mav iesj lav usjudallam ja suohtas låhkåt mav sån ussjol. Ánná-Káisá la læhkám vissjal tjállet gå iesj lav adnám ålov dahkat ja iv la åvvo huomáham bloggistit. Válla dálla de!

Lidjiv má Guovddagæjnon dijstagás duorastáhkaj, miján lij maŋemus sámásta mujna-æjvvalibme. Ja galgav tjállet mij dahpáduváj gå lidjiv vuoddjemin Jielleváres Guovddagæjnoj. Lidjiv boahtám Suoma bælláj Garásávvunij ja galggiv gávvat gåro- váj rievtesbælláj. Iv huomáham at måj iednijn lijma ságastum dan birra, så mån vuoddjiv gårobælláj ja iv åvvo usjudallam vaj dat lij ietjá gå riekta, (Guovddagæjnoj la rievtesbælláj, jaa dij gudi lihpit vuoddjám dav gæjnov diehtebihtit máj). Gå lidjiv vuoddjám dan rahte millta álggiv ussjolit jus dal lidjiv gávvam riekta Garásávvunin vaj ij, danen gå diehto lij má at iv galggam guhkev dan rahten vuoddjet åvddål vat galggiv gávvat. Valla ij dat boahtám rahtesuorre ja vuodjiv ja vuodjiv gitta Gilbesjávrráj ja vássiv dav ja vuodjiv rája baddjel Vuodnaj ja imájstalliv gå ittjim la gávvam ájn. Vuodjiv desik ittjim vuojne ietjáv gå alla várijt ja vákkev de gal diehtiv at dát ij la riekta gåsi lav vuoddjám valla joarkkiv gåjt gitta Skibotnij. Danna de manniv butijhkka vaju ja gatjádiv lagámus gæjnov Guovddagæjnnuj ja dat lij diedon dan sæmmi rahte millta mav lidjiv boahtám, så ij lim ietjá gå moaddot ja vuoddjet gitta Garásávvunij ja de vat nuppe rahtev vuoddjet. Jielleváre ja Guovddagæjno gasska la 35 mijla valla gå mån ållijiv dåk de lidjiv vuoddjám 68 mijla. Haha, huff ij lim gal suohtas valla hæhttuv má berr tjájmmat dasi dálla. Hehe…

Ja degu mån tjálliv la kampánja-ájgge juo nåhkåm. 1.5 jáhke la juo vássám! Dát la læhkám nav buorre ja ájnas giellakampánja, mijá giella, sámegiella la akta mijáj ájnas vædtsaga. Mån lav nav mihá gå dat la muv iednegiella, muv gållegiella. Dát giellakampánja la munji ålov vaddám, diehttelis rádnajt ja oahppásijt birra sábmes valla aj ållo diedov ja vájmmelisvuodav vaj mij nuora berustip ja sihtap oahppat ja nanostuvvat sámegielav. Mujna la læhkám vissjalisvuohta ja ávvo gå lav dájna barggam, gå lav instagrammim gåvåjt sámebágoj, gå lav tjállám dánna blokkan(vajku lav unnán lájkke ja iv diehtám man birra tjállet) ja diehttelis gå lip æjvvalam – gájkka ambássadøra ja jådediddje dán kampánjan. Dálla gå hæjttáv tjállemis sidáv berr gijttet muv åvdås ja sávvat vuorbev sámegielajn, adnit dav, oahppit dav ja vuosedit dav, dálla – idet – ja álu!

Ps, Jus ga kampánja la nåhkam sjattav joarkket muv instagram-bielijn @unnarievsak, vaj mujtodahtáv ja oahpav sámegiel bágojt ja moallánagájt. Så tjuovvit val dav @unnarievsak 🙂