- Sáme mannulakæládus ij la vuojga jådon julevsáme guovlon, dåssju gallegattjan le duoddeæládussan. Dán guovlon - ienemusát Divtasvuonan- le sáme kultuvrra nanos, ja le stuorra máhttelisvuoda åvddånahttet muossádimijt ja miellagiddis vásádusájt dán guovlon. Oahpes saje duola dagu Stáddá - Vuona nasjonalalasj várre ja Rádjebálges, gånnå li ållo kulturmujtojs ja histåvråjs, li goappátja buojkulvissan nanos sáme dåbddomerka ma máhtti liehket stuorra máhttelisvuohtan.
Mannulakåvddånahttem gånnå sáme kultuvrra ja dábe li vuodon, tjuovvu aj ájggeguovddelis ájggedábijt mannulagájn gånnå ulmutja åtsi oalle muossádimijt ja vásádusájt, gånnå ulmusj boahtá lahka bájkálasj kultuvra ja "suojmma manni" luondo lahka. Dá li aj ájnas kvalitiehta vuona mannulagájn, gånnå sámeiellem máhttá buktet ájn ienep dav mij le oalle ja sierra.
Almulasj mannoæládusá nannim, mannulakvidnudagá ja ietjá orgána li ienebut ælvvám sáme vásádusájt mannulakfálaldahkan, ja dát le sierra nammaduvvam ráddidusá mannulakæládusá ájggomusájn jagen 2012. Gålmmå nuorttamus fylkasuohkana, Innovasjon Norge ja Sámedigge ruhtadi aj doajmme vijdes prosjevtav åvddånahtátjit sáme mannulakæládusáv Nuortta-Vuonan, mij Origo Nord jådet.
Prosjækta galggá tjalmostit mannoæládusá åvddånahttemav julvsáme guovlon nav vaj dát lassán ja tjielggasabbon åvddånboahtá miellagiddis sáme mannoæládussan. Árran le prosjæktajådediddjev virggádam gut galggá dilijt láhtjet ja arvusmahttet vejulasj ásadiddjijt (gründere) sáme mannoæládusájt álgadit. Prosjæktajådediddje ja værmádahka galggá tjalmostit mahtudakåvddånahttemav ja arvusmahttemdåjmajt. Prosjevta baktu galggi konkrehta åvddånahttemij barggat oattjotjit ienep sáme mannoæládusdåjmajt åvddåprosjevtaj baktu, ma de ihkap máhtti álgaduvvat sierraláhkáj:
- Åvddåprosjækta Njunes biebbmo ja kulturmuossádime
- Åvddåprosjækta Måske skåvllå guovdátjin muossádimijda
- Åvddåprosjækta Rádjebálges ja báhtariddjijdoalvvovádtsema
- Åvddåprosjækta Árran guossidimguovdátjin
- Åvddåprosjækta Julevsáme merraguolásdus
- Åvddåprosjækta Vuona- Svieriga helikoptermannulagá
Prosjevtan galggi guovtijn åvddåprosjevtajn barggat åvddånbuvtátjit ja sadjihij biedjat: sáme duobddága ja turissma ja web-prosjækta «Árran balvaj sinna». Vuostasj nammaduvvam prosækta le åvddånahteduvvam åtsådimprosjæktan ja nubbe galggá buorreláhkáj åvddånbuktet ja bájkálasj sáme mannoæládusájda jådedimmáhttelisvuodajt buktet.