Jagen 2006 mierredij Sámedigge jut galgaj åtsådimprosjækta ásaduvvat maŋep doarroájge báhtariddjijdoalvvoma birra. Dát barggo Árran julevsáme guovdátjij juogeduváj, mij de barggagådij prosjæktajuohkusijn 3 åtsådiddjijn. Ulmmen lij åvddånbuktet histåvrråfágalasj dokumentierimav báhtariddjijdoalvvomav sáme guovlojn, sierraláhkáj Divtasvuonan. Galgaj dagáduvvat kulturfágalasj dokumentierim sámij báhtariddjijdoalvvoma birra oassen Vuona doarro- ja doaro maŋŋeájggásasj histåvrråj, ja ja analysierit manen ja gåktu sáme báhtariddjijdolvvo ettjin oattjo ánssidimev ietjas bargos maŋep væráldadoaro ájgen. Dát åtsådime vuodon galggin arkijvvavuorká ja ságájdahttema. Prosjæktajuohkusin lidjin dr. art histåvrå fágan Marianne Neerland Soleim, professor dr. philos. Jens-Ivar Nergård ja dr. art. Oddmund Andersen. Prosjevta båhtusa li åvddånbuvtedum girjen «Grenselos i Grenseland. Sáme ja dáttja báhtariddjijdoalvvoma nuorttalij Nordlándan ja Oarjje-Tråmsån 1940-1945». Girjje almoduváj jagen 2015 ja dav máhtá Árran julevsáme guovdátjis diŋŋgut.
Åtsådibme ja dokumentierim báhtariddjijdoalvvoma birra maŋep væráldadoaro ájge.
Báhtariddjijdoalvvo Divtasvuonan doalvvum birrasij 3000 ulmutja Svierigij maŋep væráldadoaro ájge. Dáv dahkin vájku dujska juo 1942/43 ásadin váksjomsajijt rijkarájáv váksjutjit. Báhtariddje boahtegåhtin Divtasvuodnaj juo jagen 1940, valla báhtaribme lassánij jages 1942. Sæmmi båttå ásaduváj báhtarimværmádahka duojna dájna bargoj. Muhtema viehkedin idjadimij, iehtjáda vas bierggasijt riksaldin ja báhtariddjijt vuonaj sisi suvdatjin ja dan maŋŋela rijkarájá rastá doalvvun.