Åvddåprojækta le gálggiduvvam vidnudahkaj Code arkitekter, Oslon, aktisajbargujn vidnudagájn Rambøll, Bodø. Åvddåprosjækta galggá giehtadaláduvvat Árrana stivras åvddåla almoduvvá. Åvddåprosjækta le vihpam biehtsemáno vuostasj biejve rájes ja galggá låhpaduvvat javllamáno jagen 2017.
Åvddåprosjevta rappårtta gárveduváj snjuktjamánon jagen 2017. Rappårta 70 bielen li tjáleduvvam arkitektåvnålasj ja teknihkalasj oajvvadusá tjoavddusijda, 72 arkitekttjuorggusa ja 5 gåvåj baktu gåvvidusá, ja merustallama.
Prosjevtan li tjuorgaduvvam, tjáleduvvam ja merustaláduvvam ådå mánájgárdde, ådå tsiekkadus kåntåvråjda giellaåssudahkaj, oajvvetsiekkadusá (A) ietjájduhttema musea vuosádusájda, kulturåssudak ja ietján ådåstuhttema kåntåvrralanjájt ja aktisasjlanjájt. Stivrra ij la dálátjij mierredam jut gájkka oasseprosjevta galggi dagáduvvat.
Dán ájggegávdan guoradaláduvvi ruhtadimmáhttelisvuoda 15 oasseprosjevtajda duon dán stuorrudagás. Iesj dat tsiekkadusbargoj álggemplána li jagen 2018, ja ájggomussan la låhpadit bargojt jagijda 2019-2020 ja maŋŋela. Gå prosjækta l stivras dåhkkiduvvam, de sjaddi ienep dahkamusá almoduvvat.