Bårjås 2008

Dát le lågåt jahkegierdde Bårjjåsis, ja jage li gållåm dalutjis gå vuostasj bále almoduváj jagen 1999. Lars Børge H. Myklevold hæjttá dal dåjmadiddjen, ja sihtap suv gijttet buorre bargo åvdås. 2008 le valjesvuoda jahke. Basádismáno 23. biejve 2007 rabáj Árrana dávvervuorkká ådå oasev vuodovuosádusás, mij vuoset sáme båndorsijdav. Dát vuosádus, duodden artihkkalijda dán jahkásasj Bårjjåsin, vuosedi valjesvuodav sáme sebrudagás. Vargga gájkka oassálasste li barggam, jali lågådallam Árranin jagen 2008. Ragátmánon 2008 ásaduváj giellakonferánssa Árranin, ja dassta lip Høiera ja Johansena lågådallamijt tjáledahttám. Guovtes tjállijs dán jahkásasj Bårjjåsin, Borgos ja Kintel, gåhtjoduvájga artihkkalijn oassálasstet, danen gå barggaba tiemáj ma hiehpi dán almodussaj. Yngve Ryd vuoset boanndudagáv sáme låddenamájs. Låtte li vuostatjin nabdedum vitsárdallamij jali guvkkalimij milta, ja dan maŋŋel háme milta, ja aj gåktu viessu. Tjállá ahte ådå namá álu gávnaduvvi, ja ihkap vilá li máhttelisvuoda gávnnat namájt ma li dåbddusa dåssju boarrásap sámij gaskan. Gávnnuji gus låddenamá ma ælla nammadum artihkkalin? Johan Borgos tjállá sáme smirjárij birra Viestarálen. Histåvrrå sámij smirjárij birra ij le vuojga dåbdos, valla huoman le ájnas, dajna gå duosstu åvddåguottojt ma javlli dáttja kultuvrra le árvvusabbo sáme kultuvras. Máhttep ienni javllat ulmusjtjerda li læhkám aktisattjat tjanádum nubbe nubbáj ålles histåvrå tjadá. Oddmund Andersen subtsas lagábut sáme båndorsijda birra julevsáme guovlon gitta 1950-låhkuj. Tjállá hiebadime birra gånnå iesjbierggim ja moadda dåjma lidjin oase iellemis, gånnå dá dåjma sáme båndorsijdav gievrrodin. Gidán 2008 lij Árranin Louise Fontaina gåvvåvuosádus: “Varder – en tilstand av tilhørighet”. Ájggegávdan 1961 – 1976 vierttijin máná Kalalit Nunaatis skåvllåpolitihka diehti jåhtet Danmarkuj, ja dåppe oassen sjaddat fámiljas vaj dánskagielav galggin oahppat. Louise rájaduváj ierit, ja massij ietjas iednegielav. Uddni dárbaj dålkåv gå æjgádij ságas. Ann Irene Sæter vuoset gåktu buorre skåvllåpolitihkav galga dåjmadit, skåvllåjådedime baktu mij dåbddå sáme sebrudagá ásadusáv. Subtsas aj gåktu sáme oajve, jali entrepenøra, li læhkám ájnnasa sebrudakåvddånime hárráj ja Divtasvuona skåvlåj hárráj. Inger Johansen vuoset dutkama baktu oarjjelsámeguovlojn man ájnas le dåbdojt dádjadit gå le sáhka giela nannima birra. Sijáj gaskan gudi e sámegielav ållåsit ságasta, le huoman stuorra máhtudahka, vájku e sámástit buvte. Gávnnuji má hieredime ma guosski sámástibmáj. Jorun Høier vuoset giellabargon gávnnuji gæjnnoválljima. Oajvvat viehkev man birra bierrip ájádallat jus julevsámegiella vuostasjgiellan galggá bissot skåvlån ja sijdan. Anna-Stina Svakko artihkkala baktu vuojnnep Jielleváregáppte le segadus julev- ja nuorttasáme gápptedábijs. Jielleváregáppte rievddaduvvá ja ådåsmahteduvvá ájgij miehtáj, ja le vas anon. Gåktu li gápte 100 jage duogen? Lis-Mari Hjortfors tjállá gåktu Anna-Stina Svakko ja ietjá duodjára gáhttiji sáme árbbedábálasj máhtudagáv. Oahppam li vuodomáhtudagáv sijdan, ja skåvlåj baktu ja duodjuhime baktu li maŋenagi duodjetjiehppen sjaddam. Thomas Kintel tjállá aj duoje birra, gå giehtadallá dav lahka aktijvuodav sáme dájda ja duoje gaskan. Dát aktijvuohta le ietjáláhkáj gå vuonadáro sebrudagán gånnå sieradusáv dahki dájda ja dájddaduoje gaskan. Lars Magne Andreassen - dåjmadiddje