Vuona álmmukmusea ja Kulturhiståvrålasj musea Oslon åttjudin gassko 1880-jagij rájes gitta 1970-jagij rádjáj viek ållo sáme museadávverijt ma dálla galggi sirdeduvvat ruoptus Sábmáj.
Mij lip akta guhtta sáme museajs gudi oassálasstep Bååstede-prosjevtan aktan Sámedikkijn, Vuona álmmukmuseajn ja Kulturhiståvrålasj museajn. Prosjevtav gåhttjop Bååstede (mij la oarjjelsábmáj ja merkaj ruoptus).
Barggo hiebadit ja vuosstájválldet dájt dávverijt la riek buoragit jådon.
Duogásj
Jagen 2012 tjálij Sámedigge sjiehtadusáv Vuona álmmukmuseajn ja Kulturhiståvrålasj museajn jut lahkke oasse, birrusin 2000 museadávvera, sáme dávvertjoahkkes mij dájn museajn uddni gávnnu galggi fievrriduvvat ruoptus Sábmáj sáme museajda majt Sámedigge ruhtat. Dát mærrádus tjuovvu Vuonarijka vælggogisvuodav sámij hárráj álggoálmmugin Vuonan, ja galggá sámijda buktet iesjrádálasjvuodav ietjas kulturárbes.
Dát la histåvrålasj sjiehtadus gå dákkir stuorra máhtsadimprosessa ælla åvddål Vuonan dáhpáduvvam. Danmárkko la dahkam dav sæmmi gå máhtsadin 35000 dávverijt ruoptus Ruonasednamij. Valla Vuonan le dát prosjækta ådåájggebarggo museajda.
Dávvertjoahkke gærdoduvvá
Ájnas prinsihppa máhtsadimes le proveniens – dat sihtá javllat dávvera galggi máhtsaduvvat dajda sáme museajda gåsstå museadávvera båhtin dalloj gå tjoahkkiduvvin.
Dan diehti galggá Árran oadtjot dávverijt julevsáme ja bidumsáme guovlos Vuonan ietjama hállduj ja æjgguj. Dát sjaddá lasedit mijá dávvertjuohkkev viehka ednagav gå badjel 350 ådå dávvera galggi máhtsaduvvat Árranij.
Ájnas barggo
Árran la riek ávon gå bessap oassálasstet dákkir ájnas bargguj. Prosjækta vihpá dálla jagev 2017. Ruhtadibme le hásstalus gå máksá viehka ednagav åttjudit ja jåhtuj biedjat máhtsadimev sihke museajda gudi vaddi dávverijt, Vuona álmmukmuseaj ja Kulturhiståvrålasj museaj, ja Árrana museaj ja dåj nuppe vihtta ietjá museajda gudi oadtju ruoptus dájt dávverijt. Prosjækta gájbbet sierra ruhtadimev stáhtas.
Mediatjállusa prosjevta birra:
https://www.nrk.no/sapmi/ikke-helt-klare-for-den-store-oppgaven-1.13711301
ttps://www.nrk.no/sapmi/_-kultuvraarbbaj-la-dat-ajnas-1.13556032
Dánna máhtá ienep diedojt prosjevta birra låhkåt: http://www.norskfolkemuseum.no/no/Samlingene/samisk/Samisk-kulturarv-tilbakefores/
http://www.sametinget.no/content/search?SearchText=b%C3%A5%C3%A5stede
Lågå Bååstede-rapportav dánna: http://www.folkemuseet.no/PageFiles/6823/Sa120301%20B%C3%85%C3%85STEDE%20rapport%20underskr%20.pdf