+47 75 77 51 00 
Oasse vuodolágaávvudimes 1814-2014
Brudd 2014 - gåvvåvuosádus ålggolaháj birra
Vuonarijka histåvrrå 200 jagij demokratijajn ja nasjåvnålasj aktisasjvuodajn la aj histåvrrå hæsodisvuodas ja aktuvuodas. Dan stuorra subttsasin mijáj birra, Vuonarijka ja vuonarijkagij birra, li moattes gudi vierojduhteduvvi.
Duodden subttsasij friddjavuodas ja sebrudahttemis, gávnnuji aj subttsasa ebdalussjamis, ålgoduvvamis ja vuojnnemahttásin dahkamis, åvdep ájges ja aj dálásj ájges. Oasátja dajs subttsasijs gávna dán vuosádusán. Dánna li duola dagu subttsasa dárojduhttema, bajásgiessemanstáltaj, nállebiologija, rubmaha, mielggavige, páhperahtesvuoda, doajmmahieredime ja gárevsælggatjanádime birra. Bessap aj oahpásmuvvat gárramvuoda nuoraj árggabæjvváj ietjasa gåvåj baktu.
Sihtap ájadallat gåktu midja musean máhttep gaskostit ja vájkkudit ájggeguovddelis, ájnas ja iehpetjoavdedum tjuolmajda mijá sebrudagán. Mij sihtap Árrana musea galggá liehket sadjen miellagiddis sebrudakdágástallamijda, - gånnå rájá «mijá» ja «sijá» gaskan gádudi. Vuosádusá oajvveulmme la duodastit man láhkáj midja, juska li ærádusá, lip oassen sæmmi sebrudagás
Vuosádus la dagádum Árran julevsáme guovdátjis, Bierguna Stádamuseas, Alle Museas, Nasjåvnålasj dálkasmuseas/Vuona Teknihkalasj Museas, Oslo Museas ja Alle-Agder-museas.
Gåvvåtjuollde: Rune Eraker.
Brudd la Kulturráde jagen 2003 álgadam viehkedittjat museajt åtsådalátjit ja vijdedittjat ietjasa rållajt ja oassálastátjit iehpetjielgga sebrudakgatjálvisájda.
- Vuosádus rabáduvvá sæmmi biejve, bårggemáno 28. biejve, Ájluovtan (Árran), Oslon ja Biergunin ja muhtem sajijn Alle-Agderin. Vuosádus la Árrana musean basádismáno 21.bæjvváj 2014.
- Vuosádus la doarjodum Kulturrádes ja Hordalánda fylkasuohkanis.
Præssaj: Ienep vuosádusá birra, guládalá Anne Kalstad Mikkelsenijn, akm@arran.no jali Torhild Skåtun, torhild.skatun@tekniskmuseum.no tel: 95 17 12 20
Hiebalgis gåvåjt oattjo sjiehtadusá milta
Vuosádusás: «Gájka galgajma buorre dádtjan sjaddat»
« Usjudalá, månnå sábmen, vuostasj jagijt gå lidjiv sadjásasj åhpadiddjen, ittjiv dibde ietjam oahppijt munji sámástit skåvlån. Hæhttujin munji dárustit jus sihtin mujsta vásstádusáv. Gå dav usjudaláv, de vil uddnik dassta skámádav. Mån jáhkkiv duohtan lij, sámegiella le æbddásabbo.
Dajnas gå iehtja lidjiv, sámegielak mánnán, åtsådallam moadda vierredago skåvlån. Hæhttujma dárustit, ja jus ejma dádjada, de mijáv bilkkedin jali hæhttujma skábmotjiegan tjuodtjot. Juo nuorajskåvlån mierrediv ietjam mánájda dåssju dárustit.
Muv máná, gudi 1960- ja 1970-lågon bajássjaddin, gájgodin muv gå iv lim sidjij mánnárájes sámegielav åhpadam, ja diedáv muhtemijda sijás la dát læhkám stuorra surggon.»
(åhpadiddje sáme bájken Måsken, 2010)
Vuosádusás:
«Báhtja tjuottjudi guovte rájddon saljon, gåsstå dievnastiddje tjællárij doalvvu. Danna oadtju bassambeŋka nali biejadum gijsás soahpov ja rájddamav, ja de juohkka akta báhttja basát dajt akti diededum basádimbagádusáj milta. Dievnastiddje galggá gåtsedit, gájkka dáhpáduvvá ságastallama ja stuojme dagi báhtjaj gaskan.»
Skåvllåsijdda Ulvnesøy, 1882
1800-jagijn moadda Vuona stáda ásadin bajásgiessemanstáltajt «skindigis ja tjádjánam» báhtjajda, maŋŋela gåhtjodum skåvllåsijddan. Báhtja galggin åhpaduvvat rádjánisvuohtaj, vælggogisvuohtaj ja roattov autoritetajda guottátjit. Biejve lidjin garrasit reguleridum åhpadusájn ja rubbmelasj bargujn. Nuktalibme dagu båråk vádtset, tsábbmudallat jali tjivvahit ij lim sierralágásj. Gasskamærrásattjat lidjin báhtja 12 jage, ja årrom lij gålmmå jage.
