+47 75 77 51 00 
Vuosádusrahpam guovvamáno 4.b. kl.10.00
Buuti Pedersen Árranin
Buuti Pedersen la Kalaalit Nunaata/Ruonáednama dåbddosamos ja viehka árvon anedum dájddár. Ietjas dájddárvuodajn ja dåjmalasj sæbrrama baktu duon dán kultuvrrajgullevasj prosjæktaj maŋemus 30 jage, le sujna guovdásj rålla Ruonáednama dájdav ja kultuvrav åvddånahttemin. Ietjas moadda tjuorggasij ja hiervvimij ja stuorra berustimijn le sån luottajt miehtáj Ruonáednamav guodám. Suv gájkbelakvuodajn ja dájddadagoj glássas, relieffas, malerijas ja akvarellas le sån miellagiddis gaskostit. Duodden dasi sihtá Árran aj álggoálmmukdájdav tjalmostahttet
Vuosádusrahpam guovvamáno 4.b. kl. 10.00
Dájddárvuodajnis baktu le sån ållusijt njuoradam, e val dåssju sij gudi Ruonáednamin dájdas ja kultuvras berusti. Sån la duodaj nahkam Ruonáednama dájdav ienebujda dåbddusin dahkat, rijkasin ja aj ålggorijkajn. Buuti la barggam prosjevtaj moatten rijkan, Ruonáednama åvdåstiddjen vuosádusájn ja aktisasjbargon ietjá dájddarij ietjá kultuvrajs. Ietjas 30 jage barggoiellemin la sån barggam moattelágásj prosjevtaj duola dagu Danmárkon, Færsuollujn, Islándan, Vuonan, Suoman, Svierigin, Dujskan, Frankrijkan ja Ruossjan.
Buuti la åvdemusát dåbddusin ietjas moattebájnok, vargga niehkolágásj jiegŋabiernajs. Stuorra, bieddjis biernaj tjavgga stuvssim ja dánssim nubbe nuppij li Buutiv dájdanis mielastuhttám ja arvusmahttám. Dájdda lij åhpadus mij maŋŋela åvddånahteduváj persåvnålasj dádjadussaj jiegŋabiernajs, gånnå sirdeduvvi ietjasa luondulasj universas ienep myhtalasj væráldij. Gallegasj sárgastagáj nahká labudahtte jiegŋabiernajt gåvvit. Muhtem bále vuojnnu dagu dánssa, ietjá bále fármastibmen jali stuvssimin. Bierna li álu dagu álkkes láhkáj sárggiduvvam, sárgastagájn mij le hábmen. Dát dættoduvvá tjielgga bájnoj, ábaj vuosstebiellen álkkes sárgastahkaj. Dát gåvvåj ráfev buktá, valla bájno li huoman tjielggasa ja fábmogisá.
Vuosádus la luojkadum RiddoDuottarMuseas – Sámiid Vuorká-Dávvirat (RDM-SVD)
Vuosádus la Árranin snjuktjamáno 24.bæjvváj 2015
