Motijva li gåvå ulmutjijs, duobddágijs - ienemusá Tråmså guovlos, symbåvlålasj ja ålles jali muhtem mudduj abstrákta gåvå. Vattáldagán li aj badjelasj nielljalåk originála giehtatjuorgadum kárta iesjgeŋga guovlos Sámen. Dájdda la ålles iellemájges dájddárin. Keviselie/Elle-Hánsa/Hans Ragnar Mathisen la moadda vuosádusájda oassálasstám ja la moadda almulasj ásadusájs oastedum daj gaskan Dájda nasjonáldávvervuorkás. Jagen 2017 lij sån Documentan - mij moaddásij mielas la værálda ájnnasamos vuosádusarena ájggásasjdájddagij.
Sjiehtadus Keviselie/Elle-Hánsa/Hans Ragnar Mathisena ja Árran Julevsáme guovdátja gaskan stivras dåhkkiduváj 15.12.2017 ja dan milta galggá Árran tjoahkev háldadit ja dájddafágalasj dågålasj láhkáj magasinerit. Árran galggá gájka dájddagijt katalogiserit ja dájddagav gaskostit stuoves ja gasskabåddåsasj vuosádusáj baktu, aktan viehkedit váj dájddár bæssá ietjá vuosádusájda ja dávvervuorkájda.
«Dáv moatte siváj diehti dagáv», javllá Keviselie/Elle-Hánsa/Hans Ragnar Mathisen. «Sávav tjoahkke la avta sajen tjoahken ja jut sáme ásadusás várajda váldeduvvá.»
Joarkká: «1980-lågon oahpásmuvviv sebrudakberustiddje julevsámij. Sijá visjonera ja duosstelis vuojno muv måvtåstuhttin. Muhtema sijájs Tråmssåj båhtin ja muv rádna sjaddin. Dåbdåv ietjam degu sijdan dåjmalasj ja buorremielak sámij gudi sámeássje åvdås rahtji, danen gå lav bajássjaddam ájgen gå dát lij vargga tabu.
Sån åvdet «Jáhkáv Árran sjaddá nahkat dáv dájddavattáldagáv háldadit. Sidáv tjoahkke galggá avtan sajen tjoahken ja jut dájdda máhttá moaddásijda ávvon, aj muv biejvij maŋŋela.»
Keviselie/Elle-Hánsa/Hans Ragnar Mathisen låhpat dajna jut «Sidáv aj guddnedit ietjam juomisjvieljav guhti jámij jur maŋŋel gå riegádij ja la hávddáduvvam Áhkánjárgan/Narvijkan. Árran la lagámus sáme guovdásj.»
Árrana stivrrajådediddje Andreas Mikkelsen javllá sån la «viehka ávon gå Elle-Hánsa la válljim dákkir stuorra vattáldagáv midjij vaddet. Vuollegattja lip ja sihtap dájddagav buoremus láhkáj sujttit. Lip juo rudájt biedjam 2018 budsjæhttaj váj máhttep álgov dahkat bargguj.»
Direktørra Lars Magne Andreassen la «njuorranam ja ávon gå dákkir vattáldagáv oadtjop. Ájggop válldet aktijvuodav Sámedikkijn ja dájddafágalasj ásadusáj váj oadtjop bagádusájt ja rádijt gåktu dáv buoremus láhkáj dahkat.»
Joarkká «vattáldahka viehka vuogas ájge bådij danen gå miján li plána guovdátjav stuoredit prosjevta baktu Árran 2020. Lip plánajt hiebadahttám navti váj la magasijnna dájddagij ja vuosáduslanjá oajvvehuodnahin. Dárbahip ruhtadoarjjagav jus galggap investerimijt nahkat ållit. Ajtu lav buorremielak prosjevta åvdås. Jáhkáv dájdda edna ulmutjijt gæssá.» låhpat Andreassen.
Symbåvlålasj gálggim la gasskavahko 24.05 kl. 13 Árranin. Gájka li vájmulattjat buorisboahtem.
