Åhtsåmmierre: Bårggemáno 18. biejve 2014

Museajådediddje + Rádevaddde Árranin.

Museadåjma fágalasj ja háldadus bargo jådedibmáj almoduvvá stuoves virgge Museajådediddje/Konservátåvrrå + Rádevaddde (gasskaájggásasj). Norsk tekst? - Trykk på flagget nederst.

Árran 2014. Foto: Árran

Árran – Julevsáme guovdásj.

Árran – Julevsáme guovdásj ásaduváj 1994 Ájluoktaj Divtasvuona suohkanin. Árrana ulmmen le liehket nasjonála guovdásj mij sáme gielav, kultuvrav ja sebrudakiellemav julevsáme guovlon bisot ja åvddånahttá. Árranin li museadåjma, sámegielak mánájgárdde, sáme giellaåvddånahttem ja videokonferánsaj baktu giellaåhpadus, åtsådimprosjevta, nuorttaguovloj gatjálvisáj barggo, almmudakdåjma, j.i.

Huodnaha ja lanjá lájggiduvvi Sámediggáj, NRK Sámi Radioj ja universitiehtajda Bodådjon ja Råmsån ja Staped;aj. Aktan sijáj gudi lájggiji le birrusij 40:sijn bæjválasj barggo Árranin. Ienep diedo Árrana birra gávnnuji www.arran.no næhttabielen.

Museadoajmma le akta vuododåjmajs. Museabargo ulmme le mierreduvvam Ájggomusá strategitjállagin ierit ietján jut musea barggo doajmmá ICOMa mærrádusáj milta. Oajvvebarggon le gájkka bargo åvdep ja dálásjájge sáme kulturhiståvrrå julev- ja bihtámsáme guovlojn. Sámedigge le háldadusfábmudahka sáme museajs ja jagen 2007 sjattaj Árran museavásstediddjen julev- ja bihtámsáme guovlon. Museadoajmma bihtámsáme guovlon álgeduváj 2009 jage rájes kontåvrråsajenis Bájddárin. Museadåjma li pládnadokumenta dagádum.

Árran le institusjåvnnå mij le åvddånime ja dutkambarggo le nanostuvvam ájn gå Álggoálmmukdiehto dutkaminstituhtta ásaduváj Bådådjo allaskåvlå aktisasjbargo baktu.

Musea dálásj dåjman le 4,5 jahkevirge. Duodden le doarjjadåjma aktisasjháldadusás personála, økonomija ja teknihkalasj bargoj hárráj.

Julevsámegiella le guovdásj árvvon Árranij ja museadåjman galggá giella guovdátjin liehket.

Fra Árran museum. Foto: Árran/Nils Heika Aira-Andersen

Museajådediddje/Konservátåvrrå + Rádevaddde (gasskaájggásasj).

Museadåjma fágalasj ja háldadus bargo jådedibmáj almoduvvá stuoves virgge Museajådediddje / Konservátåvrrå + Rádevaddde (gasskaájggásasj).

Barggon le:

Jådedit museadåjmav julev- ja bihtámsáme guovlon.
Dárkestit, tjuovvolit ja tjadádit musea ájggomusájt.

Máhtudagáj gájbbádusá:

Binnemusát mastergráda åhpadus sebrudakdieda jali kulturhiståvrå fágaj.
Sáme kultuvra ja sámegiela máhtudagá.
Hiebalgis barggohárjjánibme. Åtsådallama museabargojs le sávadahtte.

Gájbbeduvvam máhtukvuoda:

Máhtukvuohta virggáj ulmutjin.
Virgen le moattelágásj dahkamusá ma gájbbedi aktisasjbargov iehtjádij ja mássjkedisvuodas dárbbo.
Máhtudagá åvddånahttembargguj, båhtusij jåksåmijda, strategalasj bargguj, iesjrádálasjvuohtaj ja doajmmelisvuohtaj dættoduvvi.

Fra Árran museum. Foto: Árran/Nils Heika Aira-Andersen

Rádevaddev museabargojda

Jus ruhtadimijn vuorbástuvvap de aj máhttep gasskaájggásasj virggáj biedjat rádevaddev museabargojda avta jahkáj, virgge máhttá mælggadappov bissot. Máhtudagáj gájbbádussan biejaduvvá alep åhpadus sebrudakdiedalasj, humanistak jali kulturhiståvrålasj fágaj. Dagu museajådediddje virgen, de máhtukvuohta virggáj ulmutjin, sáme kulturmáhtudahka ja sámegielaj giellamáhtudahka dættoduvvi. Hiebalgis barggohárjjánibme ja åtsådallama museabargojs le sávadahtte. Barggon li tjanádum musea gaskostim-, duodastim- ja prosjæktadahkamusá.