Præssadiedadus: 3 buolva aktisasj vuosadus

Sjatto vuojnnuji suv dájdalasj luottajn- Hildur Haraldsenan (84 jage vuoras) le  vuosádus Árranin aktan niejdajnis Åsijn (56) ja áhkkovijn Ingri (26). Vuosádus vihpá ragátmáno 8. biejve rájes. Vuosádusáv li nabddám 3 buolva. Vuosádusán li moatte lágasj bargo ja teknihka. Ieddne ja áhkko Hildur vuoset gåvvåteppenijt,  Åse vuoset gåvåjt ma li mállidum, collage ja relieff, ja nuoramus – Ingrid vuoset gåvåjt ma li dagádum duojna dajna teknihkajn.

 

Hildur Haraldsen le buorreluonduk dájddár, nissun stuor måjijn.  Sån boahtá Valdresis, valla ådnå nuorttas jådij.  Åroj 40 lågev jage Sandnesjøenin åvddål gå aktan ietjas ålmmåjn Harald Haraldesenijn  jådij Divtasvuodnaj. Harald lij riegádam ja bajássjaddam Divtasvuonan. Hildur lij oahppam tjuolldet (vevet) iednestis, Sofie Vigerustas, oattjoj fáhkagirjev gåvvåtjuolldemij, åhpadusáv Kunst og Håndverkskolen Oslon ja Åhpadiddjeskåvlåv Bådåddjon.

 

Hildurin la ietjas tjuolldemhuonaj Kalvijkan gånnå sån ájn tjuolldá. Tjuolldam la gåvvåteppenijt (ránojt) gájkka mánájda (6) ja dálla le barggamin smávva  gåvåj áhkkovijda, motijvaj  låttijs ja divrijs -17 gåvå. Hildur komponeri ietjas gåvåjt tjáppa bájnoj. Sån adná Hanna Ryggena sitáhtav: "Rádno galggá guojtet ja liehket gehtjastahkan"

 

Juska  sujna le læhkám stuorra famillja ja ållo åvdåsvásstádus, de le sån ænndu vuorodam dájdabargov jagij miehtáj ja moadda suv bargojs li  oastedum almulattjat ja li læhkám vuosádusájn.

 

Hildur, niejdda Åse ja áhkkov Ingri dán jage bargojt rádjin “Nordnorskenij” árvustallamij, danna Hildura rádno “Kvinnerolle” dåhkkiduváj.

 

Dat la vuostasj bálle gå Hildurin la vuosádus Divtasvuonan. Sån la akta ájnegattjajs guhti várajda válldá gåvvåtjuolldemteknihkav ja dán dábijt ja dan diehti lip ávon.

 

Åse ja niejdda årroba Ørnesan, ja sunnun la vuosádus. Vuosedibá gåvåjt collage, avtav relieffav ja soames muorrabargov. Åse váttsij sæmmi dájdaskåvlån Oslon degu iednes ja maŋŋela lij oahppe Statens Kunstakademijan. Åsen lij oajvvevuosádus Hamsund-biejvij- 2002. Danna sån gåvvij sitáhtajt Hamsunda románas Pan.

 

Soames suv gåvåjs vuosádusán Árranin le   Spireung, mállidum arvusmahttemis  soames gåvvårános  majt suv áhkko (Hildura ieddne) lij tjuolldam. Duodden Åse vuoset relieffav 7 bargos muoras, gåvåjt ja tjuorggasav ja aj guokta bargo gånnå Státtátjåhkkå le motijvan.  

 

Ingri le iesski álggám ietjas dájddaåvddånimev  ja le maŋemus jage gærggam Bachelor- grádajn  dájdajn ja designajn  Høgskolenin Oslon  Bilbao universitehta, Spanian, baktu. Dán giesse sån oassálasstá viehka stuorra ja  buoragijt dagádum gåvåjn mij  luondov nav buoragijt gåvvi, ja aj soames silkkiteknihkka gåvåjn majna sån la mælggadav barggam. Ingrija mielas la geldulasj gæhttjaladdat ja gávnnat ådå teknihkajt ja åvddånbuktemvuogijt. Juska sån le nuorra ájn de le  oassálasstám moatten vuosádusán, ja dála le sujna vuosádus  Toulosen, Frankrijkan.

 

Tiebmá vuosádusán Árranin la sjaddo/åvddånibme. Gålmån buolvan Haraldsenin lij aktisasj vuosádus dán jagásj Petter Dass biejvij  Helgelátten ja maŋŋel  vuosádusá Árranin ragátmáno galggá vuosádus rájaduvvat Divtasvuona ráddnasuohkanij Gällivarráj gålgådismáno álgon.