“Sámebivtasduodje le oasse mijá árbbedábes, ja dav oasev mij lulujma tjuovvot åvddålij guovlluj”. Navti Kaja Andersen álgat ietjas girjev Julevsáme Doahkojgápte. Girjen li bagádusá gåktu unnep doahkkogáptijt goarrot ja dan baktu låhkke bessá oahpásmuvvat gápptegoarromijn. Dát tæksta ij bárep tjielggi jur gåktu gáptev vadjá ja gårru, ájnat tjalmos ájnnasamos bágojt ma dán bargguj gulluji .
Gápptásin gåhttju tydjav massta gáptev ájggu goarrot. Duodden dárbaj ruvdajt buddasijda ja aj listov majt gápte hælmmáj ållu maŋemussaj gårru.
Gáptev skánda milta vadjá. Vadjat la gå skánda milta mihtti ja biessket. Gápten li gålmmå jali niellja oase duodden sasijda ja oalggebiehkijda. Hárddobielle l guovte oases ja åvddåbielle juogu de avta jali guovte oases.
Åhtsån ja sassegiehtjijn li buddasa. Nieljetjiegak ruvddabiehkke hárddon le gávlos. Dav máhttá ietjas miela milta hiervvit. Buddasijt dåhkki aj muhtem mærráj bårdudit ietjas miela milta, valla vuodobuttas, vuolemus buttas, galggá ruoppsadin nissunijda.
Ålmåjgápten ij la gávlos, ájnat goahkka. Dat la juogu de alek jali ruodná. Ruoppsis nieljetjiegak ruvddabiehkke gåhkan la divlle.
Gápptáj dåhkki aj gájrájt goarrot vaj hielmme galjep sjaddá. Lissto diedon aj gápptáj gullu. Dåhkki duodden ruvddalistov hælmmáj goarrot åvddåla dábálasj listov dan gæhtjáj vat giddi.
Bágo:
Gápptás – stoffet koften syes av
Ruvdda – klede
Hielmme – (kofte)kanten
Skándda – mønster
Vadjat – klippe til etter mønster
Åhtså – barmåpning (i kofte)
Sasse – arm
Buttas (fl.tall.: buddasa) – (fastsydd) kant rundt halsåpningen og armene
Vuodobuttas – det nederste kantbandet
Badjelbuttas – det øverste kantabandet
Buddit – å sy fast buddasa
Sádjá – pynt, dekor på kofte
Gávlos – firkant av klede som hører til buddasa
Divlle – firkant av klede som hører til gávlos
Goahkka – krage
Gájrrá – kile
Ruvddalissto – kantband av klede nederst på kofta
Lissto – vevd kantband nederst på kofta
Gáldo:
Andersen, Kaja (2005). Julevsáme doahkojgápte. Ájluokta/Drag: Forlaget Báhko
