Sliehppá gullu gápptáj. La ruvdas dagádum ja hiervviduvvam la njalodum bieddjissasnijn ja álu aj danijn.
Nissunsliehppá. Duodjár: Karete Pedersen.
Ålmåjsliehppá. Duodjár: Karete Pedersen
Sieradus ålmåj- ja nissunsliehpá gaskan le bájnno. Nissunsliehpán la ruoppsis vuodobájnno ja ålmåjsliehpán alek. Ietján de duodjar iesj mierret maktas sihtá sliehpáv hiervvit ja gåktu galggá vuojnnut. Juska uddni soajttá la dábálamos edisik vehik sliehpav daddnit, gávnnuji aj njallomsliehpá ma ælla danijn hiervvidum, ájnat njalodum bieddjisasnijn duon dán hámen.
Sliehpán li guokta stiellasa: Tjiebet ja vuodo. Vuodon le juogu de bielle-mánno jali nieljetjiegak, ja sihke tjiebedin ja nieljetjiegagijn li álu moadda unnep oase. Dåhkki aj juohket vuodov gålmmå åsijda gånnå gasskalamos oasse la ietjá bájnos.
Sliehpán li guokta stiellasa ma li vas unnep åsijda juogedum. Duojdár: Karete Pedersen
Elsa Aira ja barggoguojme tjálli daddnimsliehpá «tjiebet la juogedum stuoráp nieljetjiegak åsijda, daddnidum álkkes ruossaj ja vinjogij». Dálásj sliehpájn li moattelágásj daddnima, ij dåssju ruossa ja viŋgoga.
Ålmåjsliehppá. Duodjár: Sigrid Jessen.
Nissunsliehppá. Duodjár: Karete Pedersen
Ålmåjsliehppá. Duodjár: Lilian Urheim
Nissunsliehppá. Duodjár: Lilian Urheim
Digitalt Musueuma næhttabielijn gávnná moadda gåvåjt dålusj sliehpájs.
Gáldo:
Aira, Elsa; Tuolja, Karin; Sandberg, Anna-Lisa Pirtsi (1995) Julevsáme gárvo. Lulesamiska dräkter. Boden: Tryckarna AB
