Vuoddaga li bátte majt bádjasa birra gæssá. Da ælla snjisjkodum bátte dagu avve ja lissto, valla li lådåduvvam.
Dállidum gábmága aktan vuoddagijn. Duodár: Berit Guvsám
Dát bloaggatjállus ij snivva tjielggi låhtåm-minsstarijt jalik jur gåktu låhtå. Gehtjasta Harrieth Aira bloaggatjállusav jages 2013 gånnå julevsáme vuoddaga lidjin tiebmán. Danna gávna oanes video gånnå Lill-Tove Paulsen subtsas juohkka minsstara birra ja aj låhtåma birra gájkkásattjat.
Gáma aktan vuoddagijn. Duodjár: Marie Amundsen
Vuoddaga lådåduvvi låhtåmmuorajn. Susanna Knutsen subtsas buorre låhtåmmuorra ij la ållu njuolgga, valla la vehik såddjot.
Låhtåmmuorra lådågijn
Ålmåjvuoddaga gåhtjoduvvi snjierága ja árbbedábálattjat lådåduvvin ruoppsis ja alek, jali ruoppsis, alek ja ruodná bájnojs. Uddni vuojnná aj vuoddagijt ietjá bájnoj, valla li agev snjierága.
Snjierága. Duodjár: Lotte Ekhorn Gælok
Gávnnuji guokta slája nissunvuoddaga. Tsavága li vuoddaga gålmåt oases iesjguhtik bájnoj. Elsa Aira girjenis tjállá tsavága li ienemus árbbedábálattja ja sierraláhkáj bassebiejvijda dajda tjágŋin. Susanna Knutsen subtsas Kjerran Kjerran gåhttjun dakkir vuoddagijt gehtjagin danen gå dakkir vuoddagijn lidjin nav moadde gietje. Subtsas iehtjáda, ja sierraláhkáj vuona sinna, dakkir vuoddagijt tsavágin gåhttjun, soajttá danen gå guokta oase li tsaveduvvam akti.
Tsavága/gehtjaga. Duodjár: Susanna Knutsen
Tsavága/gehtjaga. Ruoppsis ja visská oase li tsaveduvvam akti. Duodjár: Susanna Knutsen
Duodden gávnnuji avtabájnuk vuoddaga duon dán minsstarij ma li uddni dávk sæmmi dábálattja dagu tsavága. Minsstara gåhtjoduvvi suolluga, viŋgoga, belaga ja guosaga. Dåhkki dákkir minsstarijt biedjat tsavágijda aj.
Suolluga. Duodjár: Ellinor Solstrøm
Suolluga. Duodjár: Astrid-Helen Gælok
Viŋgoga. Duodjár: Susanna Knutsen
Viŋgoga. Duodjár: Karete Pedersen
Viŋgoga. Duodjár: Berit Guvsám
Guosaga. Duodjár: Anne Silja Turi
Guosaga. Duodjár: Kaja Kalstad
Belaga suollugij. Duodjár: Inga Mikkelsen
Tsavága viŋgogij. Duodjár: Susanna Knutsen
Tsavága viŋgogij. Duodjár: Berit Guvsám
Vuodobájnno l árbbedábálattjat ruoppsat, valla gåvåjs vuojnná vuoddaga ietjá bájnoj li uddni sæmmi dábálattja. Tsavága lij ruoppsis, visská, ruodná ja alek bájnojs. Girje «Julevsáme gárvo» ja «Ave, bátte ja vuoddaga» svieriga bieles subtsasti ruoppsis oasse galggá guovddelin liehket. Vuostasj girjje duodden javlla Duorbunin li gávnnum vuoddaga gånnå giehtjebájnno l ruoppsadin læhkám. Susanna Knutsen subtsas Kjerran ettjin bieja visská oasev giehtjegijda, valla visská viŋgogijt dajda álu suohppun.
Snjierágijda máhttá aj minsstarijt suohppot.
Snjierága suollugij. Duodjár: Karete Pedersen
Snjierága suollugij. Duodjár: Anne Silja Turi
Snjierága viŋgogij. Duodjár: Eskil Mikkelsen
Snjierága viŋgogij. Duodjár: Karete Pedersen
Snjierága viŋgogij. Duodjár: Berit Guvsam
Vuoddagav gábmagij gartsajn gittij. Garttsa l sassnebiehkke majt gårru gitta vuoddaga gæhtjáj. Nuppe gietjen la uhtsalåhtå/unnalådusj diehpijn.
Garttsa. Duodjár: Berit Guvsám
Uhtsalåhtå/unnalådusj.
Muhtema javlli unnalådusj ja muhtema vat uhtselåhtå. Sæmmi ássje birra l berustahtek sáhka, namálattjat unna giehtsep lådåga birra mij la vuoddaga gietjen.
Garttsa ja unnalådusj. Duodjár: Berit Guvsám
Álgon tjálliv vuoddaga lådåduvvi ja e snjisjkoduvá, valla ij lim dat ållu riekta. Barggovuoddaga álu snjisjkoduvvin, subtsas Susanna Knutsen. Navti aj tjuodtju Aira, Tuolja ja Pirtsi Sandberga girjen. Barggovuoddaga, jali árggavuoddaga, lidjin avtabájnuk vuoddaga girjakhárpoj dagi, ja danen li álkkep dajt snjissjkot farra dan låhtåt. Danen gå aneduvvin bæjválasj iellemin duon dán bargoj aktijvuodan lidjin da tjáhppada jali russjkada.
Barggovuoddaga. Duodjár: Susanna Knutsen
Gáldo:
Aira, Elsa (2000). Ave, bátte ja vuoddaga. Band fra lulesamiskt område.
Aira, Elsa; Tuolja, Karin; Sanberg, Anna-Lisa Pirtsi (1995). Julevsáme gárvo. Lulesamiska dräkter.
Knutsen, Susanna. Informánnta.
