Sáme suhtto
Oaivemozit/galskap/madness, 2013 - Máret Ánne Sara.
Le gus sámevuohta dåhkkidum oassen nasjåvnålasj subttsasis? Gåsstå nanos politihkalasj berustibme sáme dájdan boahtá? Kulturráde ja Sámedigge tjalmostahtti ájnas gatjálvisájt jahkekonferánsan 2017. Gatjálvisá guosski dáttja ja aj sáme dájdda- ja kulturbarggijda!
Loga dán teavstta davvisámegillii.
Lohkh daam teekstem åarjelsaemien.
Les denne teksten på norsk.
2017 la mærkkajahken sámijda. Dán jage la 100 jage vuostasj sáme rijkatjåhkanimes Roandemin, 40 jage Álttá-aksjåvnås ja 20 jage dallutjis gå Gånågis Harald vájvahij dárojduhttempolitihkav sámij vuoksjuj. Dá dáhpádusá li ednagit buktám. Sámedigge vuododuváj jagen 1989, ja edna sáme institusjåvnnå li tsieggidum. Gidán mierredij Stuorradigge jut kommisjåvnnå mij galggá sámij ja guojnaj histåvråv guoradallat galggá nammaduvvat.
Rijkajgasskasattjat sáme ja álggoálmmugij dájda gatjádaláduvvi, valla man mærráj la sáme åvddånbuktaga vuojnnusin ja gullumin mijá nasjåvnålasj kultursubttsasin? Le gus dáttja kulturbarggijn buorre máhtudahka sáme dájdas, histåvrås ja duohtavuodas – ja le gus sij gåhtsemin jut dát la luondulasj oassen mijá aktisasj kultuvras? Gåktu nannip sámevuodav bærrájgåhtset nasjåvnålattjat ja sáme rijkajgasskasasj kontevstan? Tiebmá rahpá dágástallij iesjmierredime, suodjalime, måsskuma, sebrudahttema, máhto ja fámo birra.
Edna sáme dájddár adni dájdav åvddånbuvtátjit asjmev ja ietjasa duohtavuodav tjalmostahtátjit. Mij lip luojkkam bajelttjállagav dájdas sáme dájddáris Carola Grahn ja lip sáme moarev almmusij biedjam. Bajelttjála vuoset gåktu aksjonissma la ájnas oassen sáme dájdas. Majt lahka aktijvuohta dájda ja politihka gaskan merkaj? Guosská gus moarre aktisasj árvojda ma væráldav miehtáj li garra dætto vuolen uddni – luondoluohko, árbbedábe, suojmokvuohta, vuojŋŋalasjvuohta – árvo maj birra iemeálmmugijn li sierra máhtudahka ja ietjá strategijja bisodittjat?
Moarre máhttá åvddånbuvteduvvat jieddnát ja ienep sjávot. Moarre máhttá buktet konfrontasjåvnåv, dágástallamav, rájnnanimev ja ådåstuhttemav. Ájggomusáj boahtteájge gáktuj biedjap sáme dájdav ja kultuvrav almmusij.
Kulturráde jage 2017 jahkekonferánssa
Ásaduvvá aktan Sámedikkijn
Duorastagá basádismáno 9. biejve Det Norske Teatret:in
BASÁDISMÁNO 9.B.
Gånnå: Det Norske Teatret:in
Ienep diedo: kulturradet.no/arskonferansen-2017