Buohtjaskuovdov adná suodjen sjiervvedávdajda umasslágásj seksan nåv gåk guoddnánarggem, bahtarájggenarggem ja jus la njálmmeseksa buotjajn. Guoddnánarggemin suoddji aj iesselisvuodas.
Máhttá aj buohtjaskuovdov adnet ånanerijdijn, jus dåbddu vuohkasin ja tjehputjit dav biedjat ja diehtet gåktu dåbddu gå sájo buohtjaskuovdduj oadtju.
Buohtjaskuovddo gávnnuji umasslágásj stuorrudagájn,hámijn,bájnojn ja smáhkajn. Ienemus buohtjaskuovdo ma gávnnuji oasstet iemelágásj boargálijn li viehka avtalágátja, valla gávnná umasslágásj stuorrudagájt ja hámijt värmmádagán ja seksaboargálijn valjes fáladusájn.
Umasslágásj buohtjaskuovdo umassláhkáj hiehpi umasslágásj buotjajda ja danen la buorre buohtjaskuovdov gávnnat masi lijkku.
Ienemus buohtjaskuovdo li gárvedum vuojddasij danen gå galggi vuohkasa adnet ja e skuohpat.
Jus l allergiddja lateksij de máhtá adnet buohtjaskuovdojt ma li plástas dagádum.
Gåktu buohtjaskuovdov adná?
Buohtjaskuovdov biedjá gasjkos buotjaj jali seksagávnnáj. Suoddjitjit sjiervvedávdajda ja iesselisvuohtaj la ájnas buohtjaskuovdov adnet ålles narggembåttåv.
Jus sájogålgådibme boahtá buohtjaskuovdduj de galggá várrogit buotjav ålgus giesset vaj sájo e guoddnáj gålgå jali bahtarájggáj.
Márjju dárbaj vehik hárjjidallat buohtjaskuovdov rievtesláhkáj biedjat. Jus la buohtja de máhttá hárjjidallat gå biedjá dav ånanerijdin. Jus ij la de máhttá adnet buojkulvissan dildov jali gárudav majna hárjjidallá.
Nåv biedjá buohtjaskuovdov buojkulvissan buohtjaj jali dillduj:
- Rabá buohtjaskuovddogurjov.
- Siejggi kondomav vehik vaj vuojnnu goabbelij galggá biejaduvvat.
- Jus buohtjaskuovddo biejaduvvá buohtjaj de galggá gasjkos gå kondoma biejaduvvá.
- Jus la åvddånahkke de dat galggá gieseduvvat ruoptus.
- Bieja buohtjaskuovdov buohtjaoajve nali, diette tjuvdij buohtjaskuovdduj avtabále gå vuolus gieseduvvá vaj ij ilmme boade buotja jali dildo ja buohtjaskuovdo gasskaj.
- Gå buohtjaskuovddo l ållu vuolus giesedum, de buohtjaskuovdov vehik bajedasstá ja gässá vuolus desik ij ienep gávnnu giesset. Jus buohtjaskuovddo l buotjan de galggá dav ålgus giesset åvddål gå buohtja l dibmam. Aneda buohtjaskuovdo buohtjamáddaga birra, gå buotja gieseduvvá ålgus, vaj buohtjaskuovddo ij buotjas jåde.
- Hievvi buohtjaskuovdov ruhkelihttáj. Ale hievvi dav toalähttaj.
Gånnå åttjut buohtjaskuovdojt?
Buohtjaskuovdo álu juogaduvvi jali vuobdeduvvi nuorajduostudagájn.
Gávnnuji aj oasstet iehtjádij siegen dálkasboargálin, biebbmoboargálijn, kioskajn ja värmmádagán. Buohtjaskuovdo aj vuobdeduvvi automáhtajn muhtem biográfajn, bårråmsajijn ja hávskudallamsajijn. Moattelágásj buohtjaskuovdo gávnnuji seksaboargálijn valjes fáladusájn ja värmmádagán.
Majt buohtjaskuovdo máksi?
Buohtjaskuovdo dájvvamusát vuobdeduvvi skurpon måttijn buohtjaskuovdujn. Man ednagav máksi mierreduvvá makkir kondomatjerdav vállji ja gånnå dajt oasstá. Nuorajduostudagájn álu kondoma juogaduvvi mávsodak jali vuobdeduvvi álbep haddáj.
Man tjårguk la kondoma?
Buohtjaskuovddo l tjårggis suodje goappátjagá sjiervvedávdajda ja iesselisvuohtaj jus rievtesláhkáj aneduvvá, narggembåttåv ja juohkka narggembále.
Buohtjaskuovdo galggi vuorkkiduvvat ladnjatemperatuvran ja sajen gånnå ij skåba juoŋga vuosstij. Buorre saje dajt vuorkudit li jáhkkasålben jali vuossan.
Nievres saje li bahtasålben jali vinndegin bäjvádagájn. Oabme buohtjaskuovdo jali buohtjaskuovddo mij la gåjkkåm giehpebut luottan.
Ávke
- Buorre suodje sjiervvedávdajda.
- Tjårggis suodje iesselisvuohtaj.
- Ij rubmahav bájne.
Hieredisá
- Márjju hiemssi danen gå dav máhttá biedjat esski gå buohtja l gassjkum.
- Hähttu dajt ássat gå ájggu seksav adnet.
- Dárbaj hárjjidallat åvddål gå l álkke dav biedjat ja dåbddu vuogas adnet.
Ale ane lijkkevuojddasav jali oaljov
Ij galga buojddevuododum nävoj vuojddat nåv gåk oalljo jali lijkkevuojdas aktan suojijn ma li lateksis dagádum , nåv gåk buohtjaskuovddo, femidoma ja njoallomgåbtjås. Buojdde vuojn máhttá låskijdahttet suojev vaj giehpebut gajkku.
Adnet jåhtemnävojt ma li tjáhtje-jali silikånavuododum aktan suojijn lateksis gis sieldes buoragit doajmmá.
Gávnnuji gájklágásj jådedimnävo: tjáhtjevuododum, silikonavuododum jali vuojddasa ma li goappásj nävojs segadus. Dá vuojddasa li buoraga adnet aktan gájklágásj suojij.