Ájádusá vuostasj bále birra

Gå ij la seksav adnám ietjá ulmutjijn de máhtti edna ájádusá gåktu dåbddu, gåktu sihtá galggá sjaddat ja goassa sjaddá. Márjju l gullam rádnajt dan birra ságastime, filmajt gähttjam, tidnigijt låhkåm jali gullam iehtjádav massta ájádusájt oadtju gåktu ájtu galggá dåbddut.

Álu da ájádusá li guoddnánarggema birra. Guoradallama vuosedi ålos älla guoddnánarggemav adnám gå gymnásas hiejtti. Ållo oare dasi máhtti, buojkulvissan ij sidá, ij la máhttám, gávnnum, lijkku seksav adnet ulmutjij sämmi sjierves jali ij sihtá ietjá seksav adnet gå jur guoddnánárggemav.

Iesj mierret

Muhttijn máhttá diertjestimev dåbddåt jali nággidum seksav adnet vájku iesj ij sidá jali ij la gärggok.

Máhttá aj dåbddåt nággidum vuorddet seksajn vájku iesj luluj sihtat dav adnet. Dåbddåt nággidum adnet jali vuorddet seksajn máhttá mierreduvvat juogosdättos sijájs gej rádnastallá jali vuorddemusájs buojkulvissan fuolkes.

Ájnas la mujttet galggá dahkat majt allasis buoragit dåbddu.

Iesj mierret:

  •  ietjas rubmaha badjel
  • jus ja goassa sihtá seksav adnet
  • gåktu sihtá seksav adnet
  • gejna sihtá seksav adnet.

Áldarmierre seksaj?

Ij la máhttelis mierredit sierra álldarav goassa l gärggok seksav anátjit ietjá ulmutjijn, dav hähttu iesj dåbddåt. Gávnnu gis láhka mij javllá ulmutjin vuorrrasap 15 jages ij la loahpe seksav adnet jali nargget soabmásijn gut ij la 15 jage ållim. Valla lágan la aj tjáledum ij galga duobbmiduvvat jus la tjielgas ij la illastime birra.

Mierret man stuorra ärádus ulmutjij gaskan gudi li seksav adnám degu dal áldarärádus, ärádus ulmutjij åvdedime gaskan ja jus ietjáli sihtam seksav adnet.  Láhka l fámon sämmiláhkáj gájkajda juska vil sjiervve. Dát láhka l dagádum suoddjitjit mánájt vuoras ulmutja dagojs vastes dagojs majt e sidá vuorrasap ulmutjis. Lága milta avtanik ij la riektá seksuálalattjat dåmadit ulmutjij gut ij sidá.

Gätjástusá åvddål gå seksav adná ietjá ulmutjijn

Dábálasj la vuostasj bále gå seksav adná sjaddá ietjáláhkáj majt la ájádallam. Muhttijn máhttá aj dåbddut dáhppudallamin danen gå ij lim gåktu vuordij.

Seksa l juoga majt dárbaj hárjjidallat sjattatjit riekta buorre, jur degu gájkka viessomin. Älla dal nåv ålos gudi máhtti ietjas buoremuslávllagav gitárrajn spieledit váni diedek gåktu akkordav válldá, jali ij la åbbå instrumentav adnalam. Vuostasj bále åvddåla gávnnuji muhtem ássje majt galggá ájádallat ja muhtem ássjijt máhttá aj hárjjidallat.

  • Gähttjala umassláhkáj onanerit åvddåla, de l álkkep diehtet masi lijkku.
  • Gávnatjit lijkkogis sajijt nubbe nuppe rubmahijn: ságastihtte nubbe nuppijn, åhttse, gulldalihtte ja giehtto.
  • Máhttá njávkadallat, tjulástallat ja iehtjádav dahkat masi lijkku nubbe nuppev seksuálalattjat buollidit.
  • Ane suojev, buojkulvissan kondomav jali njoallomgåbttjåsav, ja hárjjidalá åvddåla gåktu dav adná.
  • Seksav adnet suoddjidum sajen márjju dahká da álkkebun luossjvedit.

Oskuld

Muhttijn gullá bágov oskuld gen birra gut ij la seksav adnám. Máhttá årrot gå ij la seksav adnám buotjajn guodnán, valla máhttá aj årrot gå ij la åbbå seksav adnám.

Muhtema e lijkku báhkuj oskuld Márjju gå gullu degu soabmásin la vihke, gå ij la oskuld. Degu galggá skábmádit gå l seksav adnám.

Ienemusá gudi bágov oskuld adni e nåvti ájádalá. Javllá val oskuld báhkon danen gå ij la seksav adnám. Gå l seksav vuostasj bále adnám de álu gåhtjudallá l oskuld massám, jali l oskuld láhppám. Márjju dåbddå mihástallamav jali ávov gå ij la des oskuld.

Juohkkahattjan la riektá iesj mierredit goassa galggá seksav adnet vuostasj bále. Ietjá ulmusj ij galga dav berustit. Ij máhte ulmutjis vuojnnet jus la seksav adnám jali ij. Ij åbbå dåktår jali gáhppeliddje máhttá dav vuojnnet. 

Guoddnátsuodtsa?

Gå javllá guoddnátsuodtsa de vuojn dat njálmme gånnå guodná ålgop målssos guodná sisŋep oassáj. Njálmen máhttá målsudahkes hábme ja njálme rabdda máhttá årrot vehik máhttsot jali gihttjot. Njálmme vijdeduvvá ja sjaddá ienep vanádahtte pubertehtan, valla dat ij goassak gádo. Ij de gávnnu aktak tsuodtsa mij måskos guodnáv. 

Danen gå ij gávnnu avtak tsuodtsa de ij ga gávnnu mige mij máhttá gajkkut gå l narggemin. Muhtem niejda gis varddi gå adni guoddnánarggemav vuostasj bále, valla dábálamos la ij varddet.

Jus de varddá márjju rabdda guoddnánjálmen la basske. Valla álu varddá ietjá oares, gå l balon jali ij la nuohkásit seksuálalattjat buollidum.

Ij ulmutjis vuojne jus la oskuld jali ij. Ij åbbå dåktår jali gáhppeliddje máhttá vuojnnet jus soames la seksav adnám.