1. GÅKTU DAHKAT GÅ BARGOV ÅTSÅ?
Àjnas le snivva ja duolla åtsålvisáv ja CV:av vuosedit. Barggovaddáj vuoseda dån le snivuk ja ráddjánis ulmusj.
Dán tjállagin le åvddåmärkka åtsålvissaj ja CV:aj majt viertti bargojda masi åtså hiebadit. Jus bv. åtså kreatijvalasj bargojt dagu sjaddohiervvididdjen jali gráfalasj designerin de åtsålvis máhttá roahkkadabbo årrot gå åtsålvis kontåvrrå- jali boargálbargojda.
Åtsålvis ja CV:a huoman galggá årrot álgge låhkåt ja ruvva danna gávnnat.
2. ÅTSÅLVISTJÁLLEMIJ BUORRE DIEDO
Åtsålvis máhttá guokta umasse vuogij milta hábbmiduvvat:
1) Åtsålvis gåsi tjálá tjoahkkájgessusav åhpadusá ja barggomáhttudagáj birra åtsålvisán. Ihkap hiehpá jus lissta máhttudagáj, bargoj ja åhpadusá birra ij le guhkke.
2) Åtsålvis CV:ajn duoddetjállagin. CV:a le sierra páhper tjoahkkájgessusijn åvdep åhpadusá ja barggomáhttudagáj birra.
•Tjále oanesláhkáj ja konkrehtalattjat. Oajvvadip åtsålvisáv avta másjijnnatjáledum A4 bälláj tjállet, jus máhtá.
•Tjále vattugit makkir virgev åtså.
•Tjále juohkka barggovaddáj ådå ”sierrahiebadum” åtsålvisáv.
•Åtsålvisaj moattedibme ij le juonalasj.
•Ane páhppárijt ja girjjijt viddnudaknamá/-logo dagi.
•Vieleda åtsålvisájgev.
Referensa:
Jus máhta referensajt vuosedit de ietját åtsålvisáv nannnoda. Referensa li ulmutja gudi máhtti ienep diedojt duv birra bárggen vaddet. Máhttá dálasj jali åvdep barggovaddev, åhpadiddjev duv åhpadusbájken tjállet. Máhttá aj tjállet åhpadusrádnav gänna dálla le alep virgge gå dujna jali lahka oahppásav gev aná duv buorreláhkáj gåvvi. Tjále ulmutja virgev, barggosajev ja telefåvnnånummarav. Mujte val sijás åvddåla gatjádit jus hihkali referensaulmutjin årrot.
Duoddetjála:
Duodastusájs moattádusájt duodden CV:aj rája, valla gártjoda páhppárvaljev. Rája dåssjå ájnas páhppárijt. Muhttijn javladuvvá dakkár páhppárijt ij galga vuostasj bále rádjat. Dalloj de ij galga rádjat.
Muhtem bargojda barggovadde sihtá dån galga barggoduodastusájt rádjat. Jus ij diede majt galga aktan åtsålvisájn rádjat de skuolka barggovaddáj ja gatjáda.
Gehtja vaj åtsålvisán älla tjállemvige jali ietjá vige åvddål gå rája.
3. ÅTSÅLVISÁN GALGGÁ ÅRROT
• Duv namma
• Adressa ja telefåvnnånummar
• Biejvve
• Vuosstevállde namma ja adrässa
• Badjelttjála. Gálldujt ja aktavuohtaj tsuojgodibme.
• Persåvnålasj duogásj: Åvddåmärkka le åtsålvissaj sierra CV:ajn ålles tjoahkkájgessusijn åhpadusá ja barggomáhttudagáj birrra. Åtsålvisán åvddånbuvtá ájnnasabmusav duv CV:as ma li virggáj árvvon. Åvddånbuvtá aj asjisjt mij ij CV:as vuoseduvá. Jus ij CV:av tjuovvusin bieja de viertti tjielggasit åtsålvisán ienebut bargoj, åhpadime, kursaj ja ietjá máhttudagáj hárráj giehttot.
• Åtsålvisa ulmme: Dánna tjála binnátjav man miela barggo le dunji, manen dån dán virggáj hiepá (persåvnålasj kvalifihkásjåvnå). Tjále majt åvddåla le barggam mij jur duv dáhká dán bargguj vuohkasin.
• Referensa: Barggovadde jali åhpadiddje gudi duv buoragit dåbddi, ja máhtti duv vuogij birra giehttot. Vállji referensajt masi li buorre aktavuoda! Referensa máhtti aj CV:aj tjáleduvvat. Åtsålvisán máhtá åvddånbiedjat referensajt ma dán bargguj duv kvalifihkasjåvnåj birra máhtti vuosedit.
• Vuolelttjála
• Duoddetjállaga – Tjále juoga de duoddetjállagij lågov jali makkir duoddetjállaga dujna li (bv. duodastusá, barggoduodastusá).
4. ÅTSÅLVIS ÅVDDÅMÄRKKA
Eva Hansen
Eventyrveien 2
8600 Mo i Rana
Tlf. 88 00 00 00 Måffe 2000 vuoratjismánno 24 b.
Narvijka mánájskåvllå
v/rektor Alfred Solnes
8500 Narvik
Åtsålvis åhpadiddje virggáj
Tsuojgodav dijá annonsaj vuoratjismáno 14 b. dán jage Fremoverin ja buorremielak ságastimijda rektor Alfred Solness sämmi biejve. Dájna åhtsåv álmmudam virgev.
Barggam lav 1998 rájes åhpadiddjen Aaga mánájskåvlån Biergunin. Ienemusát lav O-fagan, ieŋilsgielan, másjkudimen ja musihkan åhpadam. 2001 tjavta rájes lav stuoves bargov Måffe mánájskåvlån, Måffen. Dán ájgen lav klássaoajven guokta klássaj åvdås årrum.
Tjuovva CV:an, duodastusájn muv birra ienep diedo gávnnuji.
Berustimijn lav tjuovvum ådå Narvijka mánájskåvlå vuododimev. Hálijdav åhpadit skåvlån mij le ådå åhpadimvuogijt oahppij hárráj adnegoahtám. Mårredis jagi maŋŋela Ránan hálijdav dálla ruoptus riegádimstádaj Narvijka. Oarre dási le gå berrahij lagábuj hálijdav, sämmibále gå vaden sidáv Narvijka valástallamin ja musihkan oassálasstet.
Referensa
1.Rektor Hans Johnsen, Måffe mánájskåvllå, telefåvnnå 10 00 00 00.
2.Inspektörra Halvor Endresen, Aaga mánájskåvllå, telefåvnnå 30 00 00 00.
Varrudagáj
Eva Hansen
Duoddetjála: 8