Valla jus ållu álgget sidá dahkat, de le dåssju jåhtuj boahtet, duola dagu ietjat teahterjuohkusijn. I dån dárbaha dáv formálalattjat dahkat. Álge juojnak, ja de vijmanagi arvustallat jus formáliserit galga.
Dán bielen gávna oanegasj bagádimtjállagav ja linkajt mij dal duv galggá oahpestit riekta kåntåvråjda jus sidá vuododit jali álgedit siebrev, klubbav jali juohkusav ja sæmmi båttå formáliserit dáv.
Organisásjåvnåv formálalattjat vuododit
Jus galga avtav siebrev vuododit formálattjat, de viertti vuostak stivrav oadtjot jåhtuj gænna le åvdåsvásstádus siebres. Stivrra viertti guorrasit siebre ulmijda ja njuolgadusájda. Njuolgadusájn viertti:
· Siebre namma
· Bájkke
· Ulmme (manen ájggop dáv vuododit, mij la siebre doajmma?)
· Njuolgadusá sebrulattjajda siebre gáktuj
· Njuolgadusá gåktu siebre njuolgadusájt rievdadit
· Sebrulasjmákso
· Jahketjåhkanibme
Dáv vierrti tjálalattjat formáliseriduhttet. Dán diehti máhtá/máhttebihtit gullat siebrijs ma li doajmmamin ja oadtjot diedojt gåktu sijáj njuolgadusá ja ulme li tjáledum.
Gå njuolgadusáj lihpit gærggam ja siebre ulmme le biejadum de viertti:
· Oadtjot jåhtuj ruhtadárkestimev ruhtalågojn.
· Registrerit siebrev Brønnøysund-registarijda. Viertti duodastit siebrre le vuododuvvam ja dåjman la. Anen viertti sáddit njuolgadusájt ja/jali vuododimduodastusáv vaj registrerim dåhkkiduvvá.
Gå prosessa le jådon de ihkap dárbaha muhtem rádev. Válde aktijvuodav kulturkåntåvråjn suohkanin, sidja máhtti vásstedit gåktu galga barggat. Jus muodugasj siebre gávnnuji rijkadásen, de máhttá aj duv/dijá organisásjåvnnå sidjij sæbrrat ja ihkap la dárbo bájkálasj siebrev vuododit.
Na tjuovvus vuorbbe de!