Tæksta: Unni Skoglund
Parkerimsaljos Gånågisgierges le álkke gávnnat bálggáv mij alvos várev goarrit. Vuostasj oasse bálggás miehtse tjadá manná. Bálggá tjuovvu Vássjájågåv, duodden ietjá jågåtjijda. Danen de máhtá juhkamtjátjev dievddet vádtsusav nalluj.
Agev le Stáddá gåro bielen rádes buolda milta. Maŋenagi gå goarrip Vássjágåbev de binnuji soage. Årdån hæhttup jiekkev rasstit. Soajttá le vehi luvádahka valla ietján gal ælla gássjelisvuoda. Gå jækkátjav le rasstim de juova álggi. Dánna le ållo gierge ja bávte váj soajttá låssåt goarristit dájt juovajt. Juovaj nuppen bielen le dåssju njoaskásj vil åvdås Tjáhppisjávrre vuojnnusij boahtá.
Tjáhppisjávrre le tjielggaruodná goasstejiegŋajávrásj mij le 725 mehtera alludagán. Ålles váttsos le diehki bajás, danen le jávrásj vuogas jåvsådimsadje. Rádes, luvva slædo li jávres bajás ja dáppet le fijna várdudahka Áhkávuodnaj ja vijdábut Vestasjjæggáj. Oalgesbielen le Báhppatjåhkkå(Presttinden). Dåssjå Tjáhppisjávrre aktu le attraksjåvnnå ietjastis. Jus li vájmmelis máná badjel 10 jage de ij la åvvånis gássjel bessat dåhku. Sulle 2-3 tijma gållåda Tjáhppisjávrráj vádtset.
