"Jus Státtátjåhkkå lij máhttet gatjádit: Sidá gus válldut mujna?- De lidjiv mån vuorbesláhkáj vásstedit; Sidáv! Ja sidáv du iehttset duv lågådihke kontrástaj tjadá, duv mássjelisvuoda ja duv ihkkunij tjadá, gitta dan biejve rádjáj gå iv des duv åhtsåt ájmmuda; iv ájmmuda ietjam desti noadodit."
Bágo gulluji gåvvididdjáj Per- Martin Jæger. Suv vájmon le sierra lágásj sadje Státtátjåhkkåj. Dasi le diedon moadda sivá, valla åvdemusát vædjá liehket almma motijvva; linjá, komposisjåvnnå. Vuostasj bále gå tjåhkåv vuojnnij de vuolusåjvij gijnaj. Moatte bále astov dárbaj åvddål gå motijvaj lijkkugoahtá. Hæhttu vuorddet ja gæhttjat. Máhttá liehket guhkálasj prosessa åvddål gå gærggá. Valla Státtajn lij ietjá láhkáj. Hæhkkat ja váni ájgok gijnaj. Sælldát gáhtjaj ja gieresvuohta le bissum. - Stáddá le tjåhkkå masi buoremusá lijkkuv. Iv dárbaha divna várijt væráldin vuojnnet dasi duodastussan, sæmmi láhkáj gå ittjiv dárbaha divna nissunijt væráldin vuojnnet åvddål gå mierrediv válldut galggiv.
Ienep diedojt Per-Martin:a ja suv dájda birra gávna dánna:
http://www.idefoto.no/