Ådå ålmåj Viestarmeran?

Dat mij la tjielgas la gåjt jut Viestarmera válggabijran gåsi 35 suohkana sihke Nordlándan ja Råmsån gulluji, ja gånnå uddni Sámedikke rádeájras Vibeke Larsen le lista bajemusán, ij la ådå luohtádusáv nominasjåvnåjuohkusis oadtjum.

Ælla ådå luohtádusáv oadtjum

Sámedikke rádeájras, Vibeke Larsen

Foto: Dan Robert Larsen/NRK

Nominasjåvnåjuogos la oajvvadam Johan Daniel Hætta,Divtasvuonas lista bajemus sadjáj, Tove Berg, Rivtagis nuppát sadjáj ja Arild Inga Pettersen, Suorttas goalmát sadjáj.

• Lågå: Sametingstopp vraket av sine egne
• Lågå aj: Nominasjåvnåjuohkusa sámedikkelistta 2013

Dát merkaj ælla aktak udnásj Viestarmera sámedikkeájrrasijs ådå luohtádusáv oadtjum nominasjåvnnåjuohkusis.

Vuostatjin guosská dat Vibeke Larsenij, Áravuomes, valla aj Geir Johnsenij, Ruŋggogieras ja goalmádij Inga-Lill Sundsetaj, Bådådjos gudi uddni li válljiduvvam Barggijbelludagá sámedikkeájrrasa.

– Barggijbelludagá bájkálasj siebre sihti ådå ulmutjijt Sámediggáj ja mij lip gehtjadam vaj sjiervve ja geografija aj hiehpá, tjielggi Viestarmera forumstivra jådediddje ja nominasjåvnåjuohkusa jådediddje, Elin Larsen.

Gilpustallam bajemus sajijda

Valla nav gåk mij dádjadip de sihti dá gålmmåsa joarkket ájrastit Barggijbelludagáv.

Så vuordedahtte sjaddá gilpustallam gå Belludak tjåhkan nomineritjit lávvodagá Dieldanuore kro ja motellan, Skánegin.

Sihke Vibeke Larsenin, Geir Johnsenin ja Inga-Lill Sundsetan la miella ájn avta ájggegávdav Sámedikken tjåhkkåhit.

Valla nominasjåvnåjuogos ij la sijájs gatjádam jus hálijdi joarkket.

– Mij ep la sijájs gatjádam jus sihti joarkket, ep la, dan diehti gå midja lip dåssju tjuovvum dav majt bájkálasj siebrij jådediddje vieledi, javllá Elin Larsen.

Jus dal Barggijbelludagá siebre li nav miellusa dán oajvvadussaj la aj gatjálvis.

Mijá diedoj milta li nav ålos gå 11-12 bájkálasj barggijbelludagá siebre maŋŋáj gå nominasjåvnåjuohkusa oajvvadus diehttuj, guláskuddamin tsuojggim nominasjåvnå-juohkusa oajvvadusáv.

Sijá mielas ij la nominasjåvnåjuogos tjuovvum bájkálasj siebrij vuojnojt gudi beras lulu lista bajemusán. Nágin dájs bájkálasj barggijbelludagá siebrijs li gåjt Bådådjo, Fuosko, Narvijka, Loabaga ja Harstada barggijbelludagá.

Så ij la dal nav alvadahtte jus tjåhkanimen båhti sierra oajvvadusá gå dav majt nominasjåvnåjuogos oajvvat.

Dav aj forumstivra jådediddje Elin Larsen jáhkká.

– Mån dal vuordáv båhti sierra oajvvadusá tjåhkanimen. Ij la dal javladum jut nominasjåvnåjuohkusa lissta la dajt mij mierreduvvá. Dat lulu maŋutjissaj sjaddat ållu ietjá lissta, javllá sån.

Barggijbelludagá nominasjåvnnå le Dieldanuore kro ja motellan, Skánegin lávvodagá ja álggá kl. 13.00.

- Gájka gudi ietjasa li tjáledam sámedikke jienastuslåhkuj ja gudi li sebrulattja Barggijbelludagán máhtti oassálasstet ja liehket fáron mierredime gudi galggi listan tjuodtjot, subtsas Larsen.