Åhpadallagåhti sámegiellaj

Dav duodastij Divtasvuona rádeålmåj Konrad Sætra uddni gå suohkanstivrra tjåhkanij dán ideda.

Divtasvuona suohkanstivra ájras, Johan Daniel Hætta, Barggijbelludagás.

Foto: Harrieth Aira/NRK

Lej suohkanstivrraájras Johan Daniel Hætta gut sidáj diehtet makkir plána suohkanin li sámegiela åhpadussaj.

– Båhti vuojn ådå njuolgadusá guovtegiedakrudáj adnemij Sámedikkes boahtte jage ja sidáv diehtet gåktu l Divtasvuona suohkan dáv gárvedam. E vuojn boahtte jage rájes des boade vattáldahka gålmmå millijåvnåj valla ietja vierttip plánajt dahkat mij vuoset majt ájggup dáj rudáj, gatjádij Johan Daniel Hætta.

Duodastij plánajt li dahkam

Ja rádeålmåj Konrad Sætra duodastij Divtasvuona suohkan la plánajt dahkam ja dán tjavtja rájes aj åhpadallagåhti suohkana barggijt sámegiellaj.

Divtasvuona rádeålmåj, Konrad Sætra ij la dudálasj sámegiela åvddånimijn suohkanin.

Foto: Harrieth Aira/NRK

– Mij ep la udnásj rádjáj læhkám dudálattja dájna bargujn, valla dán tjavtja rájes sjaddá aktijvalasj sámegiela åhpadibme ietjama barggijda sihke rádevieson ja ietjá sajijn suohkanin, subtsastij rádeålmåj Sætra.

Sån aj subtsastij suohkan la plánajt dahkam ja hiebaduvvam åhtsåmusáv ådå njuolgadusájda li sáddim Sámediggáj mij lij viehka stuoráp gå udnásj juollodibme Sámedikkes.

– Vuorddep vásstádusáv Sámedikkes. Sij båhti Sámedikkes diehki ragátmáno 20. biejve ja dalloj de jáhkedahtte oadtjop vuojnojt ja diededimev Sámedikkes, subtsastij Sætra.

Dålkkuduvvá sámegielas dárruj gå Divtasvuona suohkanstivrra tjåhkan. Dála suohkanstivra ájras Filip Mikkelsen, Aktisasjlistas hållamin ja dålkkå Britt-Inger Tuorda suohkanstivrratjåhkanimes mij lij gidán.

Foto: Harrieth Aira/NRK