Maŋimuš ođđasat sámegillii

Åtsådij skihppijsijdav

Ájluovta sjaljon, Divtasvuonan ælla des rabás idja-biejvve huksosaje gånnå skihppe ja vuorasulmutja lulu idja-biejvve huvsov ja sujtov oadtjot.

Foto: Harrieth Aira

Divtasvuona suohkanstivratjåhkanimen mij lij dán vahko sidáj Divtasvuona bájkelista ájras, Kurt Solstrøm diehtet gåktu manná pládnabargujn åttjudittjat skihppijsijdav Ájluoktaj, Divtasvuodnaj.

Harrieth Aira

Publisert 26.10.2012 10:59.

Skriv ut
Del/tips

Suohkanstivraájras, Kurt Solstrøm.

Foto: Harrieth Aira/NRK

– Politihkkárij gaskan le má læhkám avtamielakvuohta jut galggi tsieggiduvvat huksosaje vuorasulmutjijda Ájluoktaj, ja dárbbo l lassánam. Mijá mielas bierri dal juoga dáhpáduvvat dájna ássjijn, ássje vuojnnet la sjávvunam, javllá Kurt Solstrøm.

Snjuktjamáno dán jage guorrasij avtajienalasj suohkanstivrra plánajda ásadit Guovllomedisijnalasj guovdátjav Ájluoktaj ja gåhtjoj Åvddånammadusáv pládnabargov tjadádit.

Dán Guovllomedisjnalasj guovdátjij galggi aj biejaduvvat 12 idja-biejvve huksosaje ulmutjijda gudi e sijdajn des máhte årrot.

Guovllomedisijnals guovdásj (GMG)

GMGan li sihke sierratjiehppe varresvuodadievnastusá, dagu poliklinihkka, skihppijdåhpe j.n.v ja suohkanij vuodosvarresvuoda dievnastusá dagu váktadåktår, dåktårdievnastus j.n.v.
Nammaduvvá aj lahkaskihppijviesson jali skihppijviesutjin.
Gálldo: Helsebibliotektet.no

Suohkanstivrra aj mierredij jus moattekultuvralasj varresvuoda -ja huksoguovdásj ij jåhtuj biejaduvá, de galggi huoman dá 12 idja-biejvve huksosaje tsieggiduvvat nav gåk suohkanstivrra åvddål la mierredam.

Suohkanstivraájrrasa, Kurt Solstrøma mielas la ássje sjávvunam.

Sån vuojnná uddni l vil stuoráp dárbojt gå dav majt åvddål jáhkkin gå sihke Báhpadåbesjalljo skihppijsijdan, Gásluovtan ja Ájluovta sjaljon, Ájluovtan ælla des rabás saje ja dárbbo l lassánam dijmátjis.

– Mij ep la bárep diedojt oadtjum gåktu bargujn manná, ja dat la sivva manen mån sidáv ienep diedojt dán prosjevta birra, javllá Solstrøm.

– Åvddåprosjækta la almoduvvam

Suohkanoajvve Tor Asgeir Johansen máhtij suohkanstivran subtsastit Divtasvuona suohkan la almodam Doffinij åvddåprosjevtav Guovllomedisijnalasj guovdátjij Ájluoktaj gånnå huksosaje la oasse dát guovdátjis.

– Mij barggap nav ruvva gå máhttelis, vásstet Divtasvuona suohkanoajvve, Tor Asgeir Johansen.

Foto: Harrieth Aira/NRK

– Åvddåprosjækta Guovllomedisijnalasj guovdátjij la almoduvvam Doffinin, ja dan baktu de máhtti vidnudagá buktet haddefálaldagáv tjadádittjat åvddåprosjevtav suohkana åvdås. Åvddåprosjækta galggá de lagábut guoradallat dárbojt, ruhtamerustallamav ja gåktu dåhkki tjadádit tsieggimav, subtsas suohkanoajvve Tor Asgeir Johansen.

Sån ij sidá merustallat goassá åvddåprosjevtav li tjadádam, valla doajvvu boahtte jage birán galggá dat gárvvásin liehket.

– Manná dal soames ájgge åvdås haddefálaldahka la mierreduvvam ja dan maŋŋel galggá de åvddåprosjækta tjadáduvvat. Mij barggap nav ruvva gå máhttelis, javllá suohkanoajvve.

Dasi lij Kurt Solstrøm dudálasj.

– Diedáv gåjt sij dájna barggi ja dat la ájnas, javllá Solstrøm.