Avta ja sæmmi skåvllådæhkko vuolen

– Lij duodaj muddu oadtjot skåvlåv ådåstuhtedum. Mij lip mælggadav vuorddám, javllá Ájluovta skåvlå rektor Britt-Karin Hansen.

Lávllagij Ájluovta skåvlå mánájskåvlådáses ja báloaŋŋaspreggijmij rahpin oahppe ietjasa ådå skåvlåv ja lieggijin vájmojt ja ávvudahttijn ájluovtagijt gudi dievddin skåvlåv gå vijmak Ájluovta ådå skåvllå rabáduváj.

Lejga oahppeguovtes Wilma Jessen ja Martin Kuntsen gudi almmulattjat rabájga ådå skvållåhuodnahijt.

Dat merkaj mánájskåvllå ja nuorajskåvllå li tjoahkkiduvvin avta sadjáj ja ælla des dagu åvddål guovte sierra skåvllåhuodnahijda sieradum.

Måttijt lågevjagijt la nuorajskåvllå skåvllim Ájluovta oabme skåvlån mij la oabme ja ij la hiebadahtedum udnásj dárbojda ja gájbbádusájda.

Valla dálla li gájkka 105 oahppe Ájluovta skåvlån tjoahkkidum avta sadjáj.

Divtasvuona suohkan la stuoredahttám ja ådåstuhttám mánájskåvlåv ja dasi tsieggim duodde skåvllåtsiekkadusáv mij suohkanij la máksám vargga 20 milliåvnå kråvnå.

Skåvllå dievaj skåvllårahpamij.

Foto: Sander Andersen/NRK

Vuorddám 15 jage

Badjel 15 jage lij bargge ja oahppe Ájluovta skåvlån vuorddám dáv biejvev ja dan diehti li rahpam sierraláhkáj ávvobiejvve sidjij.

- Mij lip viehka ávvusa uddni. Mijá mielas lip oadtjum buorre ja hiebalgis lanjájt majt dárbahip, ja la ihkeva buorre gå divna oahppe ja åhpadiddje li avta ja sæmmi dæhkko vuolen. Dat buoredahttá barggodilev, dav mån juo dálla vuojnáv, ja buorak la tjoahkkit sihke oappijt ja barggijt, javllá rektor Britt-Karin Hansen.

Åhpadiddje li aj oadtjum ådå, stuoráp ja buorep barggolanájt, ådå stuoráp åhpadiddjijlanjáv ja buorep bivtaslanjájt.

Ja dasi l sámegielåhpadiddje Paul Gælok dudálasj.

- Dat la buorre gå bessam lip sæmmi dæhkko vuolláj divna vehka, sierralahkáj gå mij divna bargge bessap liehket aktan. Åvddål ij lim miján buorre barggosadje, galmma ja oabme skåvllådåben, valla dálla l dille ållu ietja láhkáj, javllá åhpadiddje Paul Gælok.

GULLDAL ÁSSJEV: