«Bårjås» sámegiellaj

– Dán jage la bielle oasse artihkkalijs aj sámegiellaj jårggåluvvam ja dát la stuorra sieradus dijmásj ja åvdep jagij “Bårjås”-tjállagijs. Dát la stuorra giellalåpptim ja mij aj boahtte vaddusijn galggá boahtet, diedet Árrana rádevadde, Line Merete Skarvik.

Árran - julevsáme guovdásj almot juohkke jage diedalasj ájggetjállagav mij almoduvvá akti jahkáj.

Gitta 1999-jage rájes la dát ájggetjála boahtám jur javlaj åvddåla.

– Ájnas oadtjot låhkåt fágaartihkkalijt sámegiellaj

Dán jage la Árran válljim stuorra oasev artihkkalijs aj julevsámegiellaj almodit.

Ja dav sij dahki moatte siváj diehti.

– Ietjastis la má ájnas artihkkala båhti julevsámegiellaj vaj ulmutja galggi máhttet låhkåt fágaartihkalijt aj sámegiellaj. Dán jage lip aj oadtjum doarjjagav Sámedikkes sáme tjállusijda, ja danna l gájbbádus jut 50 prosenta tjállagijs galggi liehket sámegiellaj, subtsas Skarvik.

Dássta la stuorre ávkke javllá Skarvik.

– Gå artihkkala li sámegiellaj tjáleduvvam de li da fáron åvddånime julevsámegielav. Terma båhti sámegiellaj ja álu vuojn sámegiella ij adnu dakkár dutkam- ja muodugasj fágalasj aktijvuodan. Dan diehti l má viehka ájnas gávnnuji artihkkala ma li sámegiellaj tjáleduvvam majt ulmutja máhtti adnet.

Dán jagásj "Bårjjåsin" li gålmmå oajvvetiemá ma li iellemvuoge ællosujton, varresvuohta ja dutkametihkka.

Dánna li artihkkala dagu dálkádakhiebadibme ællosujton Nordlándan, ællosujto hiebadallamstrategija ja ællosujto árvo kultuvrraguodden ja árbbedábálasj iellemvuohken.

Duodden li aj artihkkala dutkametihkas ja guokta tjállusa gånnå varresvuohta la tiebmá. Duodden la aj akta artihkal bidumsáme bájkkenamáj birra.

- Tjállagin li artihkkala daj gålmmå tiemáj birra ma li ássje majna Árran la barggam dán maŋemus jage, subtsas Skarvik.

Uddni aj bidumsáme girjje almoduvvá

Uddni aj almot Árrana girjjealmmudahka, Báhko, girjev bidumsáme guovlos.

Dav girjev la bidumsábme Knut Sivertsen tjállám ja la suv nubbe girjje.

-Knut Sivertsen, Bájddáris la tjállám girjev majt gåhttjum la “Subttsasa dållågáttes”. Girjje l sihke julevsámegiellaj ja dárogiellaj ja gåhtjoduvvá dárruj “Historier rundt kaffebålet”. Girjen subtsas tjálle subttsasijt suv sijddaguovlos Bájddárin, dáhpádusáj birra majt iesj la åtsådallam ja subttsasijt majt iehtjáda li sunji subtsastam. Girje vuodo l dålusj sáme subtsastallamvuohke ja girjje almoduvvá uddni, subtsas Skarvik.

Sån ávttji ulmutjijt boahtet dán javlajåvddål ávvudallamij mij la bidumsáme guovdátjin, Duoddara ráfen, Bájddárin gietjan dán iehkeda.

– Ij la ietján gå boahtet Duoddara ráfáj oassálastátjit girjálasjvuoda javlajåvddål-ávvudallamij gånnå ienep diedo girjes gulluji ja gånnå aj tjálle tjavggalåhkå ietjas girjes. Mij guossodip gløggajn ja javllagáhkoj ja gájka li buorisboahtem dåhku. Girjje l má viehka buorre javllavattáldahka, javllá Skarvik ja ávttji ulmutjijt boahtet.