Biri Biernna - Julevsámegielak mánáj-TV uddni álggá

– Dát la animasjåvnnårájddo bierna birra, Biri Biernna, subtsas Jon Isak Lyngman Gælok, NRK Sáme mánájTV-bargge, gut la sån guhti la hiebadahttám dáv ådå TV-rájdov julevsámegiellaj.

Biri Biernna la biernna mij dal duov-dáv hihtti rádnajnisáj siegen.

Jon Isak Lyngman Gælok la hiebadahttám julevsábmáj.

Foto: Harrieth Aira/NRK

– Biri Biernna la biernna gut sáhkát, ja sunja li rádna dagu piŋgvijnna ja pelikádna gudi libá suv buoremus rádna. Ja duoppen-dáppen manni sij ja duov-dát dáhpáduvvá dáj sijá manojnan. Mannamin li gåjt ekvatorin ja Nuorttapåvlån li aj mannam, valla maŋenagi vierttiji sijddaj máhttsat stádtjogáhkojt båråtjit, subtsas sån.

Vuostasj animasjåvnnårájddo julevsámegiellaj

Dát animasjåvnnårájddo la dat vuostasj animasjåvnnårájddo julevsámegiellaj mij Mánáj-TV:an vuoseduvvá.

– De la vuostasj animasjåvnnårájddo mij NRK Sáme:n la julevsámegiellaj dagáduvvam. NRK Sáme:n la ulmme gåjt galggi vihtta prográmma julevsámegiellaj jáhkáj dagáduvvat. Ja mij jáhkkep animasjåvnnå la dat majna mij buoremusát oadtjop julevsáme mánájt gehtjatjit mánájTV:av, javllá NRK Sáme mánájTV-dåjmadusá jådediddje, Norleif Krokmo.

Ja uddni de vuojnnu vuostasj bále NRK Super:in kl. 17.00.

Biri Biernna-rájddo vuoseduvvá juohkka mánnodagá, dán jage vihtta programma.

Rájddo hiehpá vuostatjin nuoramusájda, valla Gælok aj hasot ållessjattugijt gehtjatjit.

– Nuoramusájda hiehpá, sidjij lip mij hiebadam rádjov, valla ållessjattugijda aj dåhkki gæhttjat gå danna la vehi gåhtjodum metahumor mij lulu ållessjattugijda aj miellagiddis gæhttjat, subtsas Gælok.

Så ij la de ietján gå tjåhkkidit gehtjatjit NRK Super, kl. 17.00 uddni.

GULLDAL ÁSSJEV BIRI BIERNA PROGRÁMMA BIRRA: