Giellarádnastallam

Divtasvuona ASVO la álgadam prosjevtav "Mij sámástip aktan - buolvaj gaskan" ja la giellaprosjækta mij galggá njálmálasj sámegielav nannit ja åvdedit.

Sámedigge la ruhtadam prosjevtav ja gålmmå julevsámegielak nuora, Ingrid Kintel, Inga Mikkelsen ja Mathias Mikkelsen, Ájluovtas Divtasvuonan fálli mánájda sámegielak arenav gånnå sámástit rádnastallama ja suohttasij baktu la oajvvedoajmma.

Sámegielak máná ja nuora æjvvali

Akti vahkkuj tjoahkkiji nuora skåvllåmánájt sámegielak rádnastallamdåjmajda.

Ingrid Kintel

Foto: Harrieth Aira/NRK

Dát la ådå fálaldahka sáme mánájda.

Ulmme l sámástit, valla gatjálvis le gåktu dav tjoavddet vaj oadtjot mánájt sámástittjat.

–Uddni ij dal nav ållo sámegiella sijdajn gullu, subtsas Kintel.

–Ja gå luondulasj sáhka ij gullu sijdajn, dat arena gånnå máná galggi sámegielav gullat, gå dat vádnun sijda bieles, de dárbahip dahkat arenav gånnå máná iejvviji bágojt ja sosialiseriduvvi sámegiellaj. Mån jáhkáv sámegiella gullugoahtá gå hárjjánip sámástit nubbe nubbáj ja máná oadtju hárjjánit sijá ságastallamgiella máhttá liehket sámegiella, dættot sån.

• Lågå aj: Mij aktan sámástip

–Dåssju akta njuolgadus: Sámástit

Æjvvalimiehkedijn la akta njuolgadus.

– Dájn æjvvalimijn la dåssju akta njuolgadus ja dat la sámástit. Dát la fálaldahka mánájda, sij bessi ietja válljit jus sihti fáron jali jus e sidá fáron. Ja gå mánná iesj bæssá válljit, “já dáv de mån sidáv”, de sån juo diehtá vuordeduvvá sujsta sámegiella jus galggá oassálasstet. Ja navti mij jåksåp nubbe nuppev, máná ja midja nuora, subtsas Kintel.

Fálaldahka la skåvllåmánájda gejn la sámegiella vuostasj giellan vuostasj klássas giehttjit klássaj, ja la akti vahkkuj.

Ja máná li diededam dási sij sihti sæbrrat.

– Gå mánájt iejvviv oassásin de tjuorvvu “Håj, Ingrid, mån ávvudaláv rádnastallamij”, så dájda iehkedijda de máná ávvudalli. Miján ælla ga makkirik diededime. Da gudi båhti, båhti, subtsas Ingrid.

Sihti sámástimev privatiserit

Ja gånnå máná ja dá gålmmå nuora galggi æjvvalit ij la ga mierreduvvam álgos.

–Miján ij la sierra sadje gånnå æjvvalip, subtsas Ingrid.

– Mij ep sidá sámástimev institusjåvnåjda tjadnat. Mij sihtap má juokkirik láhkáj privatiserit dáv. Sámegiella ij gullu dåssju skåvllåj, dåssju Árranij jali ASVOj. Sámegiella ij la juoga mij dåssju dákkir sajijn galggá gullut. Mij máhttep akta ber gånnå sámástit, ja dan diehti ij la miján stuoves æjvvalimsadje. Muhttijn lip muv lunna, ietjá bále ålggon ja ietjá bále ihkap nágin iehtjádij lunna, subtsas sån.

GULLDAL ÅLLES ÁSSJEV DÁNNA: