Sihtá sámegiela máhtudagáv nannit

– Mij ham dárbahip máhtudagáv sámegiellaj ja dan diehti la máj dárbbo låhkåt sámegielav javllá Adrian Nystø Mikkelsen akta dajs 21 studentajs gut uddni álgij dan vuostasj bacheloråhpadussaj julevsámegielan, Nordlánda universitehtan.

– Ep la moattes, lip nav gallegattja julevsáme guovlon ja gå mån lav juo sámegielav oahppam mánná rájes de la luondulasj låhkåt sámegielav, dættot sån.

• Lågå aj: – Mærkkabiejvve julevsámijda

Bodø Glimt-a mållagáhttár

Adrian Nystø Mikkelsen, sámegielstudænnta ja mållagáhttár Bodø Glimt lágan.

Privat

Adrian Nystø Mikkelsen gut aj la buosjes ja vissjalis bállotjiektje ja uddni l sadjásasj jali lijkkemållagáhttár Bodø Glimt lágan mij la 1. divisjåvnån, ij dal bárep sámegielav dárbaha gå bállov la tjiektjamin.

- Ij la dal julevsámegiella ájnas gal bállotjiektjamin, valla sámegiella l dal oasse muv identitehtas ja la luondulasj oasse munji, dættot sån.

Ja nuorra báhttja dal ij la uddni mierredam jus julevsámegiella sjaddá suv åhpadusgæjnno.

Duodden julevsáme bacheloråhpadus de sån aj histåvrråfágav låhkå universitehtan.

- Iv la ájn mierredam makkir virggáj galgav låhkåt. Mån lav ájn álgon muv åhpadusán, subtsas sån.

Valla soajttá sámegiela mastergráda loaggá.

- Ja, jus sjaddá fálaldak matergrádaj de máhtáv usjudallat álgget dasi. Jus dát bachelor la miellagiddis ja ålliv dajna, de soajttá álgáv, ij dav diehttu.

– Vuorddeba mástergrádav

Rahpamin lij aj áttják álggám ådå sámeássjij stáhttatjálle Ragnhild Vassvik Kalstad.

Dát lij suv vuostasj almmulasj manno ja bådij de julevsáme guovlluj.

Sunji la luondulasj gæhttjagoahtet jus dåhkki vijdedit dáv åhpadusfálaldagáv julevsámegiela mástergrádaj.

– Ij la dal ietján gå vádtset gæjnov vijddábut. Ga dal juo bacheloråhpadus la sajen de la ham gæjnno rabás matergrádafáládagáv fállagoahtet. Så dav de vuordáv fágabirás dánná Nordlánda universitehtan plánigoahtá, javllá Ragnhild Vassvik Kalstad gut rámmpu Nordlánda universitehtav ja julevsáme birrasav dát buorre bargos mij la dagádum.

Sámedigge aj vuojnná luondulattjan dáv fáláldagáv vijdedit.

– Gå dal bacheloråhpadus la juolgij nanna. De usjudaláv ruvva láhkáj dal aj dåhkki oadtjot mástergráda fáláldagáv sadjáj. Gålmån jagen li dá studenta gærggam bacheloråhpadusájn, ja sihti joarkket mastergrádajn. Dan diehti viertti mastergrádafáládahka lihket sajen gålmån jagen, dættot Sámedikkeráde ájras Ellinor Marita Jåma gut Sámedikkev ájrastij dán rahpamin Bådåddjon.

Sámeássjij stáhttatjálle Ragnhild Vassvik Kalstad lij aj guddnedime studentajt.

Foto: Sander Andersen/NRK