Maŋimuš ođđasat sámegillii

– SANKS-hiejttem la vájvve

– Sihke nuorajn ja vuorasappujn ålles rijkan li varresvuoda dárbo ma vierttiji gåtseduvvat, javllá Inga Karlsen. (Tjuorgasgåvvå)

Foto: LARTIGUE STEPHANE/PHOTOPQR/SUD OUEST

Sáme nasjonálalasj máhtudakguovdásj psykalasj varresvuodan (SANKS) lulu sjaddat fálaldahka dåssju Finnmárkogijda. – Vájves sága, javllá Inga Karlsen, Divtasvuonas.

Harrieth Aira
Máret Eli Buljo
Kenneth Hætta

Publisert 17.10.2012 18:56.

Skriv ut
Del/tips

Vil uddni máhtti sáme ålles vuonarijkas oadtjot SANKS-as dálkudimfálaldagájt jus dav hálijdi, valla boahtte jage rájes lulu láhkanjuolgadus rievddat dáv. Boahtte jage rájes viertti SANKS åhtsåt fállat juogu nasjonálalasj máhtudakfálaldagájt jali nasjonálalasj máhtudakfálaldagájt ja moaddeguovloj dálkudimfálaldagájt.

Lågå: – SANKS-kutt en skandale
Lågå aj: Bosted kan avgjøre om du får hjelp

Inga Karlsen, Divtasvuonas

Foto: Sander Andersen/NRK

Inga Karlsen, Ájluovtas Divtasvuonas gut julevsámijt åvdås SANKS-a addnenammadusán ja gut aj la Sáme vuorrasijráde jådediddje ij åvvånis dási lijkku ja hådjån.

– Dát lij duodaj vájves sáhka ja jáhkáv dal ulmutja ruojav dahki gå dáv gulli, javllá sån.

Ij des sjattatja fálaldahka ålles rijkkaj

Dát la SÁNAG (SANKS)

Sáme nasjonálalasj máhtudakguovdásj – psykalasj varresvuodan (SÁNAG).
La nasjonálalasj åvdåsvásstádus åvddånahttet avtaárvvusasj varresvuodafálaldagájt psykalasj varresvuodan.
Sáme máhtti oadtjot SÁNAG:is dálkudimfálaldagájt jus dav ietja hálijdi.
SÁNAG-in la: ållessjattugijda åssudak, åssudak mánájda ja nuorajda ja dutkam-ja åvddånahttemåssudak.
Gálldo: Helse Finnmark

– Máhttá gus de gåhtjuduvvat nasjonálalasj guovdátjin? Sáme ham årru ålles rijkan ja ij dåssju Finnmárkon. Dav ráddidus diehtá. Iv de mån dáv galla dádjada, javllá Karlsen.

– Oadtjot guládallat ietjas giellaj ja ietjas kultuvrajn vuodon la má viehka ájnas ájnegis ulmutja varresvuoda dilláj, dættot sån.

Inga Karlsen diehtá ållusa julevsámeguovlos li SANKS-a fálaldagájt adnám.

– Ulmutja sjávvuni jus dát fálaldahka gáhtu. Ja jus dån i oattjo dav fálaldagáv majt dárbaha, de ij gåjt de duv varresvuohta buorep sjatta, dættot sån.

Stuorra berustibme julevsáme guovlon

Árvustallam majt SANKS la tjadádam daj niellja jagij maŋŋel gå SANKS ásadij sierra kontåvråv Ájluoktaj, Divtasvuodnaj vuoset SANKS la vierttim duodde ulmutjijt biedjat bargatjit Divtasvuona kontåvrråj.

"... Li læhkám viehka ållo pasiennta dán kontåvrån, så mij lip vierttim biejdat lasse barggijt dåhku vaj duosstot dárbojt..." tjállá SANKS ietjas árvustallamin.

Julevsáme guovlos li aj rájaduvvam ållusa iesjgenga lágásj åssudagájda Finnmárkon, ja dán kontåvrån la læhkám stuorámus doajmma buohtastahtedum dåj ietjá kontåvråj ålggolin Finnmárko.

Muodástuvvá

Ij ga Sámedigge lijkku dájda ságajda.

Sámedikkeráde Ellinor Marita Jåma javllá sån muodástuvvá gå dájt ságajt gullá.

– Mij muodástuvvap oarjjelsáme pasientaj diehti, valla aj julevsáme pasientaj diehti. Sámedigge galggá ássjev bajedit ráddidusájn ja mij aj gåhttjop Helse Nord dádjadit siján la má åvdåsvásstádus gájkka Vuonarijka sámijda, javllá Ellinor Marita Jåma.