Sihtaba rahtev Måsskåj

Aktisasjlista ájras Filip Mikkelsen åhtsålij árabut dán tjavtja ássjev gå suohkanstivrra ij la ássjev giehtadallam maŋŋel gå åvddåprosjækta lij gergas dijmmá, ja ruhtamerustallam tjielgaduváj.

• Lågå aj: Måskerahte sjávvunij
• Lågå aj: Stilt om Muskenveien

Valla iektu de avtajienalasj suohkanstivrra mierredij doarjjot måskegij ja oarjjevuonagij rahtegájbbádusáv majt li gájbbedam juo 50-60 jage.

Suohkanstivra ájrrasa bivddi guovlo- ja stáhta oajválattjajt vuorodit rahteprosjevtav Måsskåj.

Suohkanstivra mielas la ájnas rahtev Måsskåj oadtjot vaj:

• Buorep láhkáj sjaddá máhttelis ávkástallat luondoressursajt guovlon dagu strávvev/energijav, merraressursajt ja ihkap minerállaressursajt jus gávnnuji.
• Buorep láhkáj sjaddá máhttelis åvddånahttet turismav ja mannoæládusáv valjes luonndoguovlon.
• Måsske aktan Måskeláhka vuodnabájkátjijn la ájnas sadje suoddjitjit ja åvddånahtátjit julevsáme árbbedábijt ja iellemvuogijt.
• Måskegijda ja Oarjjevuona viesádijda sjaddá buorre ja oalle almulasj dievnastusfálaldahka sæmmi láhkáj dagu ietján sebrudagán.

Suohkanstivra mielas ij udnásj mannomáhttelisvuohta tjoavde álmmuga dárbojt jalik vatte buoremus tjoavddusijt.

Ja suohkanstivrra de hasot almulasj oajválattjajt, guovlo,- ja stáhta oajválattjat, vuorodit rahtev Måsskåj.

- Ij la ietján gå barggagoahtet åttjudittjat ruhtadimev, javllaba Divtasvuona suohkanoajvve Tor Asgeir Johansen ja Aktisasjlista suohkanstivraájras Filip Mikkelsen gudi dán ássjen riek avtamielaga libá åttjudittjat rahtev Måsskåj, Divtasvuodnaj.