Ådå girkkohærrá Divtasvuodnaj

Vuona girkko l almodam virgev rahpusin ja Oarjje-Hålogalátte biskoahppa Tor B. Jørgensen ij dal jáhke oadtju avtak sámegielak åhttsijt dán virggáj.

– Majdis galga ælla miján avtak julevsámegielak girkkohærrákandidáhta jur dálla. Så danen vierttip oadtjot náginav gut hálijt julevsámegielav oahppagoahtet, javllá Oarjje-Hålogalátte biskoahppa Tor B. Jørgensen.

Julevsámegiellaj almulasj giellan girkkon

Udnásj girkkohærrá Magne Kolvik la doajmmam Divtasvuona girkkohærrán 18 jage.

Dájn jagijn sjattaj julevsámegiella almulasj giellan girkkon Divtasvuonan.

Ådå testamænnta julevsámegiellaj jårggåluváj ja Julevsáme sálmmagirjje almoduváj.

Duodden aj adnuj váldeduváj julevsáme liturgija mij aneduvvá mæssojn Divtasvuonan.

Biskåhpa mielas la girkkohærrádievnastussaj Divtasvuonan ållu dárbulasj girkkohærráj gut julevsámegielav máhttá ja dádjat.

– Dav ham udnásj girkkohærrá Magne Kolvik dåbdijdij girkkohærrán måttijt jagijt Divtasvuonan. Gå dal sån viertti hiejttet gå boarrásijpensjåvnnå álldarij la jåvsådam de dav vierttip dåhkkidit, javllá Jørgensen.

Dan diehti la aj virggealmodusán nammaduvvam galggá liehket máhttelisvuohta oadtjot dågålasj julevsámegiela åhpadusáv sunji gut åhtså virggáj.

– Ja de doajvvop mij gávnnap buorre girkkohærráv Magne Kolkvik:a sadjáj. Mij dájna barggap jus ga ep la ájn dási tjoavddusav gávnnam, subtsas Tor B. Jørgensen.

– Vájván gå ij la julevsámegielak giellabargge

Biskoahppa aj vájván gå girkkuj ælla ájn oadtjum julevsámegielak giellabarggev nav gåktu ájggomus lij juo dijmmá oadtjot.

Sån huoman doajvvu boahtte jahkáj la máhttelis virggáj biedjat julevsámegielak barggev.

– Doajvvomis boahtte jage lulup julevsámegielak barggev oadtjot. Muv mielas la vájvve gå vilák ij la sajen, ja dát virgge la ájnas åvddånahtátjit sáme oasev mijá bisspaguovlon, javllá Jørgensen.