– Vájmulasj æjvvalibme Gånågisájn

– Hávsske lij Gånågisáv iejvvit ja sujna lij duodaj berustibme gullat ienebuv vuoras sámij dile birra, javllá Sámedikke vuorrasijráde jådediddje, Inga Karlsen.

Vars ja Karlsen lijga Slåhtan giehttomin M.Gånågis Haraldij daj hásstalusáj birra mij duosstu vuoras sámijt uddni, ja duodden tjalmostit vuoras sámij máhtudagáv sebrudahkaj ávkken.

• LÅGÅ: Inviterte Kong Harald til Tysfjord
• LÅGÅ AJ: Sametingets eldreråd besøker Kongen
• LÅGÅ AJ: Første samiske eldreråd opprettet

Diehtovájnogis Majestehtta

Vars ja Karlsen galgajga álgos iejvvit Gånågisáv 15 minuhta, valla æjvvalibme vibáj viehka guhkebuv gå dá 15 minuhta. Gånågis sidáj duov-dáv sunnus gullat mij guosská vuorasj sámij viessomdilláj Vuonan.

– Munnun lij ållo giehttot ja sån aj gatjádij soames gatjálvisájt, subtsas Sámedikke sadjásasj presidænnta, Laila Susanne Vars.

– Diedij gus Gånågis vuoras sámij dilij birra?

– Mån jáhkáv Gånågis diehtá viehka buoragit makkir hásstalusá duosstu vuoras sámijt sihke sámegiela hárráj ja kultuvrraj gå vuorastuvvi ja jus intuisjåvnåjda båhti ja sujtov dárbahi. Miján ham ælla nuoges sámegielak dåktåra ja varresvuodabargge , javllá Vars.

Sámedigge ja Sámedikke vuorrasij ráde aj sihti Gånågis galggá diehtet vuorasj sámij máhttelisvuodav liehket resurssan sebrudahkaj.

• LÅGÅ AJ: Dronning Sonja på fjelltur i Hellmobotn (Ekstern lenke)

Oajvvadij boahtet Divtasvuodnaj

Gå dal állis Gånågisáv Slåhtan iejvvij, de Sámedikke vuorrasij ráde tjabu danga båttå gåhtjoj Gånågisáv guossen Divtasvuodnaj.

Inga Karlsen, Divtasvuonas.

Foto: Sander Andersen/NRK

Karlsen doajvvu Gånågis boahtá vaj sån aj oadtju iejvvit vuoras sámijt julevsáme guovlon. Ja sån jáhkká Gånågissaj lulu vuogas oaggomin mannat Vuodnabadán.

– Gå Gånågispárra lijga Divtasvuonan 20 jage dás åvddål sunnu sjivnnjádusmanon de M. Gånågis Harald nammadij luluj vuogas máhttsat Divtasvuodnaj luosav oakkotjit Vuodnabadán, ja mån mujttádahttiv suvva ja sávviv suv vájmostimme buoris boahtem mijá lusi guollitjit, javllá Karlsen.

Gånågis aj oattjoj káffavuossav vattáldahkan.

– Vaddiv mån sunji káffavuossav sasnes mij la sijddadilkodum majt sån aj máhttá adnet jus boahtá Divtasvuodnaj luosajt oakkotjit, javllá Karlsen.

Sámedikke sadjásasj presidænnta, Laila Susanne Vars vattij Gånågissaj hullolijnav ja hullofáhtsajt.

– Dálla l má viehka tjoaskes Oslon ja miján li sávvamus sunji vaddet árbbedábálasj duojev mij biktá suv dánna dálvveguovddela, javllá Vars.