Arealpládna guláskuddamin

Ådå arealpládna la vijmak guláskuddamij boahtám. Plánajn majna Divtasvuona suohkan la barggam ålles vásse tjavtja biejaduváj Divtasvuona åvddånammadusás dán vahko almulasj guláskuddamij.

Arealpládna aktan arealkártajn vuoset gåktu suohkana areála galggi aneduvvat.

Gå suohkanstivrra la plánav mierredam de la vælggo suohkanij dav tjuovvot ja dan milta barggat gå ådå dåjma galggi álgaduvvat, lesj dal ådå æládusdåjma, goahtetsieggima, hyhttotsieggima, ådå guollebiebmadimsaje jali rahteplána.

Suoddjit vaj adnet

Stuorámus gatjálvis la man stuorra oase suohkanin ja makkir duobddága galggi suoddjiduvvat ja máhttet aneduvvat dagu asstoájggedåjmajda ja luonndoávkástallamijda, ja man stuorra oase ja makkir duobddága galggi vas tjanáduvvat duon-dán æládusdoajmmaj, årromsajijda ja åvddånahttemdåjmajda.

Divtasvuodna la luondo bieles boanndá.

Dánna l tjáppa luonndo, sierralágásj luondoguovlo ja duo-dá sjatto ja ielle majt muhtema vuojnni buoremusát la suoddjit, dagu dåbdos Divtasvuona hummársládja mij la værálda nuorttalamos ja luonndoguovllo Divtasvuona-Oarjjevuodna mij la oajvvaduvvam suoddjiduvvam miehttseguovllon.

Divtasvuona merra l aj oajvvaduvvam suoddjidumguovllon.

Sæmmi båttå li Divtasvuonan luondo bieles aj edna luonndoressursa massta vas muhtema vuojnni stuorra ávkástallammáhttelisvuodajt, dagu industriddjaásadusá, minerállaåhtsåma, energijamáhttelisvuoda dagu dulvvadimmáhttelisvuoda ja bieggamilloásadusá ja meran vas guollebiebmadimmáhttelisvuoda.

Divtasvuona rádeålmåj, Konras Sætra.

Foto: Sander Andersen/NRK

Divtasvuona rádeålmåj ij sidá ilá stuorra oasev areálajs suoddjit.

– Mijá mielas sjaddá suohkanij gássjelis boahtte ájgge jus ilá edna oasse suohkana areálajs suoddjiduvvi. De vuojn sjaddá gássjel åttjudit ådå barggosajijt diehki ja dat máhttá hieredit åvddånahttemav, javllá rádeålmåj, Konrad Sætra.

• Lågå aj: Dåssjen adni pládnabargov
• Lågå aj: Slakter planprosess
• Lågå aj: Avviser plankritikk

Arealplánan la duola dagu bijllarahte Måsskåj biejadum, færjodak E-6 nieljijn råvij Divtasvuona sisvuonaj rastá, tjáhtjefábmoávkástallam Svieriga bieles Utsvuona bajelt Rudnávuonan ja gasskarijkasasj bijllarahte Divtasvuona ja Svieriga gaskan.

Duodden aj tjuodtju juoga Rumbojávrij birra, Davve-Vássján dajt dulvvadit ja muhtem bájkijt vuorodit bieggamilloásadusájda.

Duodden aj oajvvaduvvá tjadnat areálajt turissmalágásj dåjmajda Vuodnabahtaj Oarjjevuonan ja Vuodnagæhtjáj Áhkávuonan.

Sætra mielas la suohkan gæhttjalam gåtsedit vaj goappátjagá sihke adno ja suodjalibme gåtseduvvi. Sån sievet guollebiebmadimdåjmajda gånnå oajvvadij binnep areálajt vuorodit guollebiebmadimæládussaj gå åvddål.

– Mij oajvvadip goappátjagá. Muhtem merraguovlojt dåhkki ávkástallat guollebiemadibmáj, valla mij oajvvadip suoddjit sissŋemus vuodnasåkkijt ådå guollebiebmadimdåjmajs ja farra davemus vuodnaguovlojt adnegoahtet.

Álmmuk galggá javllat majt sihti

Álmmugin la de dálla máhttelisvuohta buktet sijá vuojnojt areállapládnaj mij la guláskuddamin gitta guovvamáno 25. bæjvváj.

– Jus gájkka manná nav gåk lip plánim de máhttá suohkanstivrra giehtadallat areállaplánav juo snjuktjamánon, subtsas Sætra.

– Valla jus stáhtalasj etáhta bukti tsuojggidusájt de gájkka maŋŋun, javllá sån.

– Gássjelis liehket politihkkár

Sjaddá de Divtasvuona suohkanpolitihkkárijda gudi maŋŋutjissaj mierredi gåktu areálajt adnet ålleslattjat.

Divtasvuona sadjásasj suohkanoajvve, Guttorm Aasebøstøl galggá maŋutjissaj mierredit.

Foto: Harrieth Aira/NRK

Divtasvuona sadjásasj suohkanoajvve Guttorm Aasebøstøl vuojnná dát máhttá sjaddat gássjel.

– Ep dal galga ietjama jámas suoddjit, mij ham galggap dánna årrot ja mij galggap åvddånahteduvvat. Valla sæmmi båttå galggap aj várjjalit mijá luondov. Dat la viehka ájnas. Så soames rievddadusá båditji majt mån sjattatjav oajvvadit dan hárráj, javllá Aasebøstøl.

Sån hálli dan guovlluj jut luondov ienebuv suoddjit ienni gå æládussaj vaddet friddjavuodav dahkat gåktu sij sihti.

– Dá la viehka gássjelis gatjálvisá. Miján la viehka stuorra nággo dálla guollebiebmadimæládusás ma sihti mierdijt biedjat duon-dán vuodnaj ja dát båktå rijdojt. Ja gå gehtjada mij dássta árvvoháhkuhibmen sjaddá ja nuppen bielen vas álmmuga dárbojt guovlojt adnet, de la viehka gássjel liehket politihkkár gå de galga mierredit, javllá Aasebøstøl gut vuorddá dágástallamijt ja ságastimev.

Areálpládna gávnnu Divtasvuonas næhttabielen. Danna aj arealkártta gávnnu mij njuolgga vuoset gåktu guovlo oajvvaduvvi aneduvvat.

• Lågå aj: Ådå areálkártta Divtasvuodnaj
• Lågå aj: Arealplanforslag vil skape debatt

GULLDAL ÅLLES ÁSSJEV DÁNNA: